WILEMSTAD. - Resientemente Korte Sivil di Promé Instansia a dikta fayo den un kaso ku un trahadó di Hilton no a pensa nunka di lo a pèrdè su trabou di e forma aki, kaminda ku 13 aña di empleo ta bai tirá afó.

Manera ta konosí pa hopi hende, dia 17 di ougùstùs tras di lomba tabatin un manifestashon ku a tuma lugá na Baoase Luxury Resort i ku a hala hopi atenshon. Un manifestashon ku a sali totalmente for di man, kaminda ku manifestantenan a kibra un porta di heru grandi i asina haña kaminda pa subi tereno di e resort.

E manifestashon aki a trese hopi konmoshon bou di trahadónan di e resort i tambe e huéspetnan ku tabata di opinion ku nan ta den un resort kaminda ku seguridat ta na promé lugá.

Den e manifestantenan tabatin un persona hende muhé bistí na unifòrm di su trabou riba tereno di Baoase. Esaki a yega na orea di gerensia di su doño di trabou den e kaso aki Hilton Hotel, ku despues a keda konfrontá ku e echo ku tal empleado femenino tabata riba tereno di e resort mei mei di e manifestantenan.

Durante e tratamentu e empleada a duna di konosé ku  en bèrdat e tabata riba e tereno di Baoase huntu ku su kasá i el a bisa ku e no a ripará nada di protesta e momentu ku e tabata tei. El a subi e tereno ta pa e wak kon e resort ta paden.

Pero riba e video ta indiká otro. E video ta ilustrá ku e empleada tabata riba tereno mei mei di tur e bochinchanan i esei tabata bisto i por a mira tambe kon den angustia e huéspetnan i e trahadónan di e resort tabata aden.

P’esei hues ta bisa ku e no por komprondé kon e empleada por bisa ku e no a tuma nota di niun akshon. El a bisa tambe ku e no ta tin nada di aber ku e manifestashon, pero hues no ta kere esaki, pa motibu ku e tabata mei mei di e bochincha i esaki ta trese e sospecho ku e tambe a partisipá na e manifestashon.

Hues a tuma e empleada aki mashá na malu, pa motibu komo un hende ku ta traha den e sektor hotelero sa ku e tipo di manifestashonnan aki ta hopi dañino pa e reputashon di e resort en kuestion i pa turismo di Kòrsou en general. E kos ta simpel, segun hues, no subi e tereno di e resort.

Es mas, e loke ku hues ta tuma e empleada hopi na malu, ta e echo ku el a subi tereno di e resort ku unifòrm di su trabou ku ta Hilton. Esaki ta trese kuné ku Baoase por pensa ku ku Hilton tambe ta forma parti di e manifestashon. Ku e akshon aki e empleada a tacha e konfiansa ku e tabatin ku su doño di trabou.

E doño di trabou ta ferwagt ku su hendenan ta komportá nan mes di e un forma na drechi.

Esaki ta pone ku Hilton ku a sinti ku su empleada a faya den un forma drástiko loke a pone ku a kit’é for di trabou mesora. Di e forma aki 13 aña di empleo a bai bentá afó. Hues a bisa ku den e kaso aki e kantidat di aña ku e empleada a traha pa Hilton no ta konta.

E empleado mester karga ku tur gastunan di korte i defensa.