WILLEMSTAD.-  Management By Akisha Albert (MBA) un akademia di kresementu personal pa damitanan di 4 pa 24 aña ku ta eduká, enkurashá i empoderá damitanan riba diferente tópiko manera, amor propio, higiena, etikèt, komunikashon i pasarela. Netamente pa esei den e lunanan benidero te ku desèmber nan ke envolví  e damitanan riba nos medio ambiente i kon nan por usa nan bos pa ta un influensia positivo pa krea konsientisashon riba komunidat.

E proyekto titulá  ‘Envirovoice’ tin  komo meta prinsipal pa  kolaborá na kuido di nos medio ambiente i solushonnan sosteníbel. Un proyekto ku durashon di  tres luna, kaminda nan lo risibí diferente tayernan di diferente organisashonnan, partisipá na limpiesa, resiklá, krea videonan ku mensahe, i kulminá esaki desèmber ku un ‘Green Fashionweekend rondoná di naturalesa kaminda nan lo desfilá kreashonnan ku nan mes a krea ku asesorio di material resiklá i tambe presentá nan mensahe i deseo profundo pa mundu.

Keda pendiente pa bo tambe forma parti di e solushon i no e polushon!