WILLEMSTAD.- E proyekto di repartishon di kuminda i pakete ku Siloam ta enkargá kuné tabata bou di hopi preshon pa motibu di fondo. Pero ku yudansa di komersio i tambe un bazar ku e fundashon a tene na prinsipio dje luna aki, e proyekto lo por sigui na bida te ku luna di febrüari. Esei EXTRA por a komprondé for di un kòmbersashon ku e kordinadó dje proyekto, sr. Angel Alvarez. T’asina ku algun siman pasá EXTRA a informá ku luna di desèmber lo por ta e último luna dje proyekto di repartishon di kuminda i pakete di fundashon Siloam. Pero e organisashon i su boluntarionan no ta entregá i lo sigui hasi esfuerso pa por yega na fondo i asina yuda hendenan den nesesidat den e region di Bándabou.

Den kuadro di esei Siloam a tene un bazar dilanti di supermerkado Van den Tweel na Zeelandia pa asina rekoudá fondo. Segun sr. Alvarez, e por bisa ku pueblo a reakshoná hopi positivo riba e aktividat aki i resultado di esei ta ku a rekoudá sufisiente fondo pa por tene kabes riba awa pa sigur dos luna mas. E bazar a bai super bon, i e tin di gradisí komersio ku a yuda ku produktonan i hendenan ku a kumpra. A lo ménos tin dos luna mas pa hala rosea, sperando ku den e periodo ei lo por sali un bon alma pa duna un aporte supstansial. Si no tabata pa e bazar aki, lo tabatin di tuma desishonnan fèrfelu, ku lo laga hopi hende desampará.

Segun sr. Alvarez, komunidat mester realisá ku nos mester stima otro mas. E proyekto aki ta ser entamá pa hendenan den e region di Bándabou. Pero resientemente el a duna un man pa esnan den e mesun nesesidat pero na Bándariba, i e tin di bisa ku e situashon na Bándariba ta meskos òf te asta pió. Tin hopi pobresa riba e lugá aki, pero hopi biaha e ta skondí, pero e tei. Tin kamindanan ku ta hendenan di sierto iglesia ta pasa yuda ora ku nan tin espasio.

Biniendo bèk riba e situashon na Bándabou, aktualmente ta entregando kuminda na un grupo di 85 hende pa dia. Separá for di kuminda kayente, pa siman ta entregá paketenan ku produktonan di supermerkado na 200 otro kas. Den e grupo aki tin hendenan ku hèndikèp físiko i mental, òf hendenan den ròlstul ku no por bai stof pa kushiná.

Segun sr. Alvarez, e proyekto aki ta(bata) unu finansiá for di donashon (personal) prosedente di Hulanda, pero tambe for di Merka i tambe Kòrsou.