Proyekto Krio di Baka na Kòrsou a lanta basta diskushon despues ku el a keda anunsiá. I esei ta pasobra hopi hende no sa presis kiko e proyekto ta. Djasabra a papia ku promotornan di e proyekto aki, tambe invershonista i personanan ku konosementu di krio di baka i di bestia den pasado.

Hopi aña den krio di bestia....

Arthur Parris (Curafresh Meat BV) tin hopi aña kaba den krio di bestia den e kaso spesífiko aki krio di kabritu na Colombia. E ta yu di Kòrsou i e ke bin ku su konosementu na su isla Kòrsou. E tambe a lanta tende ku no por kria baka na Kòrsou pasobra na Kòrsou no tin nada ta krese. E ta kere sinembargo ku profeshonalnan ku ta pensa otro por wak e posibilidatnan. Nan a hasi e estudio na Kòrsou i a Sali na kla ku na Kòrsou tin tur kos. I asina su wowo a habri i meskos e pensamentu ku semper e tabatin ku krio di bestia no por na Kòrsou i p'esei den kaso di Arthur el a hasié semper na otro pais den Sur Amérika. E tin prueba ku por solamente mester organisá. I p'esei a kuminsá traha poko poko riba e proyekto, Gobièrnu no ta bai hinka niun sèn den e proyekto. Nan lo bin ku baka pa hasi gordo na Kòrsou, pa e merkado lokal i pa eksportá ora e karni ta kla. Den e kaso aki lo bai duna basta hende trabou pasobra ta un proseso e baka tin di pasa aden pa e por keda engorda pa despues mata i e karni eksportá.

Un mito....

“E kuenta ku Kòrsou no por ta un mito ku a hinka den nos i ku nos a nase kuné pero e kos ei no ta bèrdat. Ku teknologia moderno i bo mester sa kiko bo ta hasiendo bo ta logra hasié”, asina Arthur a konta Djasabra. Nan a kuminsá traha riba e proyekto aki for di 2010 hasiendo tur e investigashonnan, wak e parti logístika, kompar’é ku Colombia, komparando gastunan. E úniko kos ku Kòrsou tin mas haltu ta gastu salarial pero tur sobra Kòrsou ta sumamente positivo.

Pa loke ta e asuntu di awa, sr Parris a splika Djasabra ku Kòrsou ta rondoná di laman. Ta e awa ei tur hende ta bebe. Asta WC ta flùsh ku e awa di bebe ei. I dikon nan no por traha nan mes awa pa e baka nan. Meskos el a bisa ku aki na Kòrsou nos ta saka so for di nos suela pero mester duna suela tratamentu pa e por sigui duna. I aki Arthur a referí na e mèst di baka i awor aki na Kòrsou lo bai tin’e.

Gobièrnu komo fasilitado...

E proyekto aki a keda presentá na diferente gobièrnu di turno. Esaki teniendo na kuenta ku ta for di 2010 nan ta hasiendo e investigashonnan. “Nos as pasa hopi doló di kabes i tin no kier a ni papia ku nos pero poko poko nos a yega na entendimentu ku gobièrnu. Un hende kua  apoyá nos i kere den nos i duna nos konfiansa i tene nos man pa nos a yega un stap mas leu ta minister Koeiman. For di tempu e tabata den oposishon el a tende nos i awor aki nos ta asina leu ku nos a firma MoU pa gobièrnu ta fasilitado di e proyekto. Nos no  ta pidi sèn pero si pèrmit i tereno. Gobièrnu lo tin di hasi kòntròl pa wak si nos ta tene nos mes realmente na e reglanan internashonal”, Arthur  a bisa.

Nos no ta loko....

Arthur tambe a reakshoná riba e punto ku lei ta bia ku aki no por importá baka pa kria pero pa mata so. El a splika ku e lei ta eksistí for di 1930.  Colombia sinembargo a bai dilanti i einan e malesa di baka ei no ta eksistí. I e gobièrnu Koeiman a kambia e lei ku si por engorda e animal aki. “Nos no ta loko, nos no ta bai hasi nada kontra di lei sino masha dia gobièrnu lo a bisa nos esei. I p'esei nos a kana e kaminda for di 2010 i pa awe nos bisa ku e proyekto ta un realidat. Nos ta sera di mira e promé mil baka”, segun Arthur.

Nada nada lo tira afó....

Ora e promé mil baka nan bini, ya den dos luna lo no tin mas pasobra tur a wòrdu mata. Ta un siklo di keda trese baka. E baka nan ta bini ku peso abou i nos ta gòrda nan pa nan keda mata. I e proyekto aki lo benefisiá Kòrsou den tur sentido. Mester di hopi yu di Kòrsou pa e  proyekto aki. Mester di hende pa planta i pa e baka nan por kome. Meskos ku e kueru di baka tambe ta bai usa. I pa no papia mes di e mèst ku lo keda transformá pa planta kuné i tambe pa traha biogas. Nada nada ta keda tira afó.

Proyekto ekonómiko...

Invershonista di e proyekto aki sr Ramon Troconiz (Curafresh Meat BV) a splika ku aki ta trata di un proyekto ekonómiko. Tur loke produsí di e bakanan ta keda bende na islanan (ABC) tambe na otro paisnan. Ya tin petishon pa karni ku lo bai keda produsí na Kòrsou. E strategia di Kòrsou ta hasi ideal i e negoshi ta bira muchu mas sustenibel.  Meskos ku Arthur a splika, señor Troconiz tambe a pone énfasis ku ta usa asta e sanger di e baka. Ku esaki el a enfatisá ku lo no bai tin nada pa kontaminá nos suela pero todo lo kontrario, lo bai usa produktonan pa yuda e suela di Kòrsou tambe. Señor Troconiz tin 3 aña kaba na Kòrsou. E tin su produkshon di karni kaba kaminda ya e ta eksportando karni. Lo no bai hinka hormona den e baka nan  i tampoko lo usa antibiótika pa nan. Esaki lo hasi e karni di baka mas salu ku tin.

Banda di e produkshon di karni di baka, e proyekto aki lo tin su benefishinan pa turismo pa Kòrsou tambe, asina sr Troconiz a sigui splika. Lo bai trese divisa tambe dor di benta di e produktonan di baka. Aktualmente nan ta sperando riba tera bou di kondishon adekuá pa por desaroyá esaki.

Terapia di kabai...

E proyekto di baka aki tin hopi tengla. Un di nan ta e terapia ku kabai ku tambe nan lo ke bin práktika aki. Sr Troconiz a splika ku meskos ku tin terapia ku dòlfein,  tin tambe terapia ku kabai. Equinoterapia ta loke nan lo bin Kòrsou tambe kuné. E ta asta mas importante ku e dòlfein pasobra e kabai ta interakta ku e hende i p'esei e ta masha importante pa terapia pa hende enpartikular pa personanan den nesesidat. Den kuadro di e Equinoterapia sr Benito Maldonado tambe ta forma parti di e grupo ya siendo un eksperto riba e tereno di operashon di e proyekto di Kabai i Baka. El a splika nos di e Hypoterapia ku ta keda usa mas pa personanan grave ku problema selebral entre otro. I e Equinoterapia ta mas pa e défisit di atenshon, outismo ets.  Equinoterapia tin su parti sosial i turístiko. Tin biaha hende no ta mir’é pasobra na Kòrsou no a kustumbrá kuné pero e ta trese turismo Kòrsou.

“Esaki ta un simia ku nos ta bai planta aki na Kòrsou i nos mester di mas persona pa traha ku nos. Nos lo bai trese e yerba di afó i nos lo trese nos kuminda importá pero ku loke e proyekto kaba lo bai traha e yerba aki mes. Nos tur lo benefisiá i nos tur tin di hasié huntu”, sr Troconiz a enfatisá na Djasabra.

Boerin Mayra  Boerhout Martis

Nos konosé di hopi tempu komo Boerin Mayra. Un dama ku a biba hopi aña na Ulanda i ku a dediká su mes na krio di entre otro baka i p'esei e nòmber Boerin pasobra esei ta loke Mayra ta i e ta masha orguyoso di dje. Mayra tin algun aña kaba na Kòrsou kaminda semper el a kana ku e idea di un krio di baka na Kòrsou. I awor el a djòin ku e invershonistanan i desaroyadonan aki pa usa su ekspertisio ku e tin pa ku baka. Manera el a splika, e ta un di e personanan ku a yuda trèk e proyekto siendo eksperto di baka. “Ta un milager a sosodé pasobra mi tambe a bin Kòrsou for di 2010 pa bin ku mi proyekto di baka pero no a logra. Mi tin diploma pa traha ku mucha outista tambe pasobra animal ta komuniká ku nos i e ta kalma nos”, Mayra a splika nos,. Ta un proyekto hopi bon pa Kòrsou, pa nos ekonomia i lo bai limitá importá karni baka i yuda nos kome salu asina Mayra a konta.