...Esaki no ta nifiká ku SONA ta skapa di su responsabilidat...

WILLEMSTAD.- A yega na un akuerdo entre minister mr. Susanne Camelia-Römer, enkargá ku Salubridat Medio Ambiente i Naturalesa, i Stichting Ontwikkeling Nederlandse Antillen (SONA) pa loke ta trata traspaso di e proyekto Hospital Nobo Otrobanda (HNO) bek pa gobièrnu di Kòrsou. Esaki a sosodé durante di un reunion djamars último manera SONA mes ta informá. Den e kuadro aki e promé pregunta di EXTRA tabata, si e desishon aki lo pone ku SONA ta skapa di tur posibel fayonan durante di e periodo ku e tabatin e proyekto bou di su maneho. Riba e pregunta aki e kontesta ta no. P’esei minister Camelia-Römer a laga traha un ‘vaststellingsovereenkomst’.

E proyekto di konstrukshon di un hospital nobo ta unu sumamente importante pa hinter komunidat di Kòrsou. Sinembargo tin vários aspekto ku no a bai bon i komo tal e minister di GMN ta poniendo preshon pa SONA duna kuenta i rason di plakanan ku nan a haña pa traha kuné. SONA ta informá ku ta for di aña pasá nan indiká ku nan ta dispuesto pa entrega e proyekto HNO bek na gobièrnu, komo esun ku a duna e enkargo di e proyekto.

Gobièrnu a disidí pa lanta algun entidat nobo bou di un ‘holding’.Tabatin bastante kombersashon entre SONA i e entidatnan pero djamars último 17 di aprel e desishon a kai ku ta legumai kombersashonnan i ta prepará pa entrega gobièrnu e proyekto.
Manera indiká ariba e ‘vaststellingsovereenkomst’ ku ámbos partido, esta SONA i gobièrnu mester firma ta enserá e.o ku e loke nan ku a tuma lugá durante di e periodo ku SONA tabata na enkargo, SONA ta keda responsabel pa nan. SONA a bai di akuerdo ku den un siman ta pasa e proyekto over, mientrastantu abogadonan ta hasiendo e preparashonnan.
SONA ta indiká ku e gastunan di konstrukshon a keda dentro di e presupuesto ku a keda proyektá, pero ta faktornan eksterno a pone ku gastunan no presupuestá a bin aserka. SONA ta haña ku no por tira eseinan si na nan kara.