Ku nos ta produsí na Kòrsou

WILLEMSTAD.- Selikor, bou di guia di e kompania EcoVision, a inisiá ku un investigashon riba orígen, tipo i kantidat di shushi ku nos ta produsí na Kòrsou. Resultado di e investigashon akí ta importante pa determiná den ki forma ta bai duna kontenido na un maneho di shushi duradero den futuro.

Durante e periodo di òktober te desèmber 2023 ta bai analisá e shushi ku ta drenta landfill. Durante e periodo akí ta pidi usuarionan di landfill nan koperashon pa por generá e datonan nesesario. Tur dato ku nos kompilá lo tin komo úniko propósito kontribuí na e investigashon. E koperashon ku nos ta pidi lo no kita muchu tempu for di e usuario i lo no stroba e proseso diario di trabou.

Komo usuario di landfill kon abo por yuda nos?

Un miembro di e tim di investigashon lo por aserká bo ku algun pregunta relatá na e investigashon na momento ku bo bin depositá bo shushi. Lo no hasi ningun pregunta di índole personal. Ku bo outorisashon lo por saka algun pòtrèt di e shushi ku bo a bin depositá. Pa un otro parti di e investigashon lo por pidi bo koperashon pa basha bo shushi riba un flur di inspekshon na entrada. Esaki ta nifiká ku lo bo no mester bai basha bo shushi riba tereno di landfill.

Nos ta konsiente ku bo tempu ta balioso i nos ta garantisá di no kita hopi tempu di bo. Di parti Selikor i EcoVision nos ta gradesí bo ku nos por konta ku bo aporte. Bo koperashon ta kontribuí pa nos sigui mehorá nos servisio i yega na un maneho di shushi duradero.

Pa mas detaye tokante e investigashon riba orígen, tipo i kantidat di shushi riba landfill por tuma kontakto ku sra. Leticia Wanga, 527-1621, purplevision21@gmail.com.

Selikor ta sumamente gradesí di por konta ku aporte di usuario di landfill en partikular. E koperashon aki  lo hiba Selikor na mehorashon na maneho di shushi duradero pa nos futuro generashon.