ORANJESTAD.-Tur kos ta kla di manera ku e luna aki pueblo di Sint Eustatius por bai urna pa skohe den un elekshon liber, representantenan legítimo den nan Konseho Insular. Tin tres partido ku a inskribí pa partisipá na e elekshon poniendo di e forma ei 26 kandidato den e kontienda polítiko. Covid-19 ta pone ku mester a hasi algun kambio na e parti logístiko, pero di tur manera elekshon ta tuma lugá riba djárason 21 di òktober próksimo.

Pa Statia esaki ta bira un elekshon sumamente importante konsiderando ku na 2018 gobièrnu ulandes, sekretario di estado Raymond Knops a drenta i tuma gobernashon di e isla over. A nombra e asina yamá ‘regeringscommisaris’ den persona di e yu di Kòrsou Mike Franco na febrüari 2018 ku a tuma over gobernashon kompletu di Statia i a pone asina polítikonan skohe un banda. Esei a sòru pa un situashon hopi difísil. Na febrüari 2020 a nombra Marnix van Rij komo remplasante di Mike Franco.

Na 2018 a indiká ku tabatin negligensia grave di tareanan di parti di e gobièrnu di. For di e tempu ei a traha duru pa trese e kambionan nesesario i restablesé bon gobernashon bek riba e isla, asina sekretario di estado Knops ta informá Tweede Kamer awe 5 di òktober.

Den e karta Knops ta splika tambe ku for di mart di e aña aki Statia ta konfrontá retonan serio debí na krísis okashoná pa Covid. A formulá 12 kriterio ku ta kondishonnan importante pa logra bon gobernashon pa Sint Eustatius. Ta spera ku na e momentu ku e Konseho Insular ta kompletu atrobe lo por tin gobernashon independiente atrobe na Statia.

Knops ta informá ku a hasi petishon pa un mishon di opservashon regional por tei presente riba dia di e elekshon. Meskos a kuminsá un kampaña pa motivá e poblashon pa hasi uso di nan derecho di voto i bai vota. Mas detaye den edishon di EXTRA.