No tin maneho duradero

WILLEMSTAD - Ya pa algun tempu kaba pueblo ta konfrontá ku e situashon di falta di okulista i lista di espera largu pa operá entre otro katarata na wowo. Ta parse ku e modelo di trese spesialistanan for di México pa traha na Advent Ziekenhuis, ku sosten di Minister Javier Silvania, no a resultá den un solushon duradero pa e listanan di espera.

Nos tur ta kòrda ku Minister Silvania a anunsiá ku lo resolvé e problema di falta di okulista despues ku el a duna Advent Ziekenhuis sosten finansiero i pèrmit a traves di Inspektor di Salubridat, Serving Keli pa trese okulistanan Mehikano i Kòrsou. Lider di MAN-PIN, Giselle Mc William ta lamentá ku pais ta den e situashon atrobe ku no tin sufisiente spesialista di wowo pa falta di un maneho duradero pa atendé e problemátika aki.

Durante reunion di presupuesto na desèmber 2021, frakshon di MAN a pidi gobièrnu, pa medio di un moshon, pa aloká mas sèn pa CMC pa por trese mas okulista i kumpra aparatonan pa hasi operashon di katarata. Pero lamentablemente e guera ku minister Silvania tin kontra di CMC for di un inisio tabata mas importante ku bienestar duradero di kuido di nos pueblo.

Minister Silvania ta keda skohé te awe pa no duna CMC mas fondo pa por atraé mas okulista i asina salbaguardiá kontinuidat di kuido, pero ta duna Advent Ziekenhuis sèn entre otro pa atraé okulistanan miéntras e tabata sa for di un prinsipio ku nan lo no keda permanente. Den kuadro di esaki, mirando ku CMC tin kapasidat pa sigur 2 okulista i optometrista permanente i pa salbaguardiá kontinuidat, ta hasi un yamada urgente na minister Silvania na nòmber di e pashèntnan di awe i esunnan di mañan, pa atendé ku e presupuesto di CMC.

Ainda no a adaptá esaki segun e rapòrt di KPMG i aloká sèn pa mas okulista permanente den CMC. Mientrastantu ta sigui warda tambe riba Minister Silvania pa adaptá e salario di spesialistanan pa medio di un dekreto (LBham) pa trese trankilidat den kuido i buta salú di pueblo na promé lugá.

Foto:

...Giselle Mc William...