Investigashon di ICUC

WILLEMSTAD.- Investigashon ku ICUC a hasi a sali komo resultado ku pueblo di Kòrsou tin masha tiki konfiansa den e instansianan asina importante manera gobièrnu, parlamento, polis i Ministerio Públiko. Ta bin aserka ku un kantidat hopi haltu di esnan ku a papia kuné ta hopi preokupá ku situashon ekonómiko di nos pais.

Studiantenan na Kòrsou a tene  un investigashon riba pensamentu di nos hendenan na Kòrsou riba diferente tema. A trata tópikonan manera gobernashon, situashon ekonómiko, trabou, situashon sosial. E datonan aki a ser kolektá den e periodo di 25 pa 30 sèptèmber. A hasi esaki ku lista di pregunta na Papiamentu i spañó.  E studiantenan aki a kolektá e datonan den área di Punda i Otrobanda. Un investigashon hasi den e forma aki ta ser yama ‘convenience sampling’.

Pa duna un enkuesta asina aki un representashon mas grandi a sòru pa kontrolá e kantidat di hende muhé/hòmber, pero tambe edat.

Hasiendo esaki ta krea un situashon ku e enkuesta ta kuadra mas ku e karakterístikanan di nos poblashon. Den terminologia akadémiko esaki ta ser yama ‘quota sampling’.

ICUC ta splika ku e kantidat di hende ku a ser entrevistá ta 135. Hopi biaha hende ta kere ku mester entrevista sentenáres di hende pa e investigashon ta bon. Esaki no ta bèrdat segun ICUC. E kantidat di hende ku bo ta entrevista ta bisa algu di e márgen di eror. Mas tantu hende bo entrevista mas chikitu e márgen aki ta. Si bo entrevista 1.000 hende por ehèmpel e márgen ta 3%.

E kantidat ku ICUC a entrevista di 135 ta duna un márgen di eror di mas o ménos 8%.

E investigashon aki a ser kordiná dor di prof. Dr. Gilbert Cijntje. El a sòru di kontrolá e lista di pregunta, e método, e kolekshon di dato, i e reportahe aki.

E investigashon tin komo meta pa sa kon komunidat di Kòrsou ta pensa riba e maneho di Gobièrnu riba algun tópiko i banda di esaki tambe kon diferente gruponan den nos komunidat ta pensa.

Preguntanan ku a hasi a kubri diferente área manera:

Kon grandi konfiansa ta den nos institutonan manera Gobièrnu, Parlamento, Polis i Ministerio Públiko;

Kon satisfecho bo ta ku  situashon di ekonomia, edukashon i nos kuido di salú;

Kon preokupá komunidat ta ku krímen, oportunidat di trabou i situashon sosial

Tambe preokupashon pa ku temanan manera Refineria, refugiado, intenshon di emigrá pa Ulanda;

Kua polítiko ta hasiendo un bon trabou i kua ta hasiendo un mal trabou?

Algu di e resultado nos por mira den tabèlnan. E resultado ta bisa entre otro ku 64% tin masha tiki konfiansa den parlamento, 69% den gobièrnu, 36% den polis i 39% den ministerio públiko. Esaki tur ta masha poko konfiansa.

Pa loke ta situashon ekonómiko 79% ta preokupá ku ekonomia ta den bon direkshon i ta konsider’é komo malu, meskos 81% ta preokupá ku oportunidat di trabou i tambe ta konsiderá esaki komo malu i 70% ta preokupá tambe ku e situashon ekonómiko.

Pa loke ta polítikonan esun ku pueblo ta konsiderá ku ta hasiendo bon trabou ta Sra. Camelia-Römer sigui pa Gerrit Schotte. I di esnan ku ta hasiendo mal trabou tin na promé lugá sra. Zita Jesus-Leito siguí pa sr. Eugene Rhuggenaath.

E preokupashonnan di mas grandi den komunidat ta kriminalidat siguí pa refineria ku mester keda i na di tres luna ku delaster luna e persona tin pensá pa bai biba Ulanda.

Preokupashon ku situashon ekonómiko ta hopi haltu