WILLEMSTAD.- Por bisa ku Punda práktikamente lo ta será pa tráfiko motorisá awe mainta, en konekshon ku e seremonianan den kuadro di apertura di Aña Parlamentario. Awe dia 9 di sèptèmber 2025 lo tin apertura ofisial di e aña parlamentario nobo, pues esun di 2025-2026, i en konekshon ku esaki tin adaptashon di situashonnan den tráfiko den e aria di Punda unda Parlamento ta reuní. En konekshon ku esaki ayera durante un enkuentro ku prensa e bosero di polis, sr. Maurits Rosalina, a duna un splikashon riba e medidanan ku a tuma i ku a drenta na vigor for di mei anochi i tambe den oranan di mardugá. Segun sr. Rosalina, pa por garantisá seguridat i un desaroyo normal di e seremonianan aki, tin algun medida di órden públiko i di tráfiko pa asina garantisá ku kosnan lo keda sin problema.

Tin algun dje medidanan aki a drenta na vigor for di ayera, djaluna 8 di sèptèmber, i bishitantenan di Punda por a nota esei, ya ku a blòkia un kantidat di aria unda sa stashoná outo. Lo no permití pa tráfiko motorisá bai den e aria di Wilhelminaplein, ni Breedestraat Punda, ni Waterfortstraat. Esei ta enserá tambe ku lo permití pa stashoná vehíkulo den aria di Wilhelminaplein, tampoko den e kaya ku ta bai Plaza Hotel. Mas aleu tampoko ta permití pa stashoná vehíkulo na Hendriksplein, for di Cinelandia, ni dilanti di De Tempel.

Segun Rosalina, mas aleu no ta permití pa stashoná vehíkulo ni pa tráfiko drenta sentro di siudat (Punda) via di Pietermaai, i esei for di Theaterstraat. Tráfiko no ta ser permití pa bai den direkshon di Parke Wilhelmina. No ta permití tráfiko motorisá pa pasa dilanti di Plasa di Gobernador den direkshon di Handelskade, ni tampoko for di Waterfort Boogjes.

Finalmente el a enfatisá ku tur hende lo tin di tene debidamente kuenta ku sierto inkombeniensianan ku por surgi komo konsekuensia dje medidanan akí. E medidanan akí ta keda na vigor te na momentu ku polis ta haña ku ta nesesario den kuadro di órden i seguridat públiko.