Dos alumno di skol sekundario ta gana kaso den Korte

WILLEMSTAD. - Mayornan di dos alumno a entamá un kaso hudisial kontra di Inspektor General di Enseñansa, pa motibu ku Inspektor a deklará e eksámen inválido, pa motibu di sospecho ku algu no tabata muchu bon pa ku e “herexamen” trahá, kaminda ku e alumnonan a skor haltu.

Den e sentensia aki, wes a evaluá invalides di e sentral eksámen realisá di biologia di dos studiante. E inspektor General di Edukashon a invalidá e eksámennan di e dos studiantenan pasobra e ta duda ku e eksámen sentral lo a tuma lugá segun e reglanan komun.

E tribunal ta haña ku e inspektor a violá e prinsipio di diligensia. E inspektor no por a tuma e desishon den e forma ku el a hasi esaki, esta sin a buska klarifikashon adekuá di e loke ku e ta pensa. E inspektor a skohe eróneamente pa sigui e pensamentu di e korektornan sin presentá esaki na e studiantenan. Esaki tabata motibu ku wes a  anulá e desishon di e Inspektor General kaminda ku e ta invalidá e eksámennan.

E loke ku a pasa den e kaso aki ta ku e menornan di edat a pasa nan eksámen final pa haña un diploma VSBO i ámbos a faya e eksámen sentral pa biologia.

Despues nan a partisipá na e “herexamen” riba 20 di yüni 2024. E eksámennan aki a keda revisá pa nan dosente di biologia komo promé korektor i despues revisá di akuerdo ku e prosedura preskribí pa un di dos korektor di e Komishon. Pero den e kaso aki e di dos korektor a nenga di koregí e eksámen di e studiantenan pasobra e tabatin sintimentu ku algu tabata robes. Entre otro, el a haña remarkabel ku e studiantenan a risibí puntonan hopi haltu pa e “herexamen” kompará ku e promé eksámen.

Esaki a pone ku Presidente di e skol, Omega a drenta den kontakto ku e inspektor riba 25 di yüni 2024 i a inform'é di e impase ku a surgi. Dia 26 di yüni 2024, Presidente di komishon di eksámen a manda e-mail na e inspektor i a interkambiá  riba e impase ku a surgi i a sugirí pa bin ku un di tres korektor pa verifiká e eksámennan di nobo.

Tantu segundo korektor komo e di tres korektor a elaborá riba e eksámennan i e loke ku e dos korektornan aki ta konstatá, ta e diferensia di puntuashon entre di e promé eksámen i e “herexamen”.

Den e kaso aki, e inspektor a mira motibu di akuerdo ku artíkulo 33 di e Dekreto Nashonal di Eksámen final V.W.O., H.A.V.O. i V.S.B.O. pa kuminsá un investigashon riba e kurso di e echo relashoná ku e eksámen nobo.

Den un karta fechá na e inspektor dia 2 di yüli 2024, presidente di e skol a notifiká  e inspektor ku te tin e responsabilidat final di e eksámen nan realisá i si e inspektor ta kere ku e kosnan no a bai bon durante e eksámen, tabata su prerogativa pa informá e skol i e alumnonan.

Den e kaso aki, esaki no a sosodé i komo tal no a investigá, no a embolbí e skol den e investigashon tampoko  e alumnonan. E korektornan a tuma nan posishon i konkluí ku algu a bai robes, sin realisá e investigashon segun e reglanan di prinsipio.

Esaki ta trese wes na e konklushon e apelashonnan di e alumnonan su mayornan  ta bon fundá. Komo konsekuensia di anulashon di e eksámennan,  ta trese kuné ku tur desishon ku e inspektor a tuma ta sera anulá.

Esaki ta nifiká ku e puntonan ku e studiantenan a risibí den “herexamen” di biologia di 20 di yüni 2024 ta keda válido i mester wòrdu establesé sin ku e studiantenan mester hasi un otro “herexman”.