WILLEMSTAD.- Milianonan a selebrá ayera nan entrega di diploma. Un fiesta ku nos hóbennan a gosa huntu ku nan mayornan, esfuersonan duru di aña eskolar tras di lomba a kulminá ku un bunita papel, nan diploma. Esaki a tuma lugá den Sta. Barbara Hotel. E okashon aki a bira aun mas spesial ora e skol a selebrá ku un hóben Quiona Schoop ku a kuminsá na PKL i a kaba na VWO, Perseveransia tabata e palabra mágiko pa Quiona, un hóben ku un sonrisa asina bunita i masha simpátiko ku tur e dosentenan na e skol tabatin palabranan asina bunita di dje. Si a yega di tende di algu asina aki den pasado nos no sa, pero e milianonan ta kere ku ta algu grandi ku nan tabata ke pa mundu konosé. En partikular e dianan aki ku tin graduashon di skolnan primario pa sekundario, hopi mayor ta kere ku ta si nan yu pasa over pa Havo so e ta konta. Quiona Schoop ta e ehèmpel bibu i bon kla di esaki. PKL ta e nivel ku ta konsentrá mas riba práktika i awe Quiona a kaba pre universitario. E ta forma parti di e hóbennan ku fin di yüli awor ta sali pa Ulanda pa bai sigui su estudio avansá.

Conrector di MIL sra. Josephina a mustra su orguyo den tur ku a pasa nan eksámen ku éksito pa Havo i VWO en partikular Quiona ku a perseverá i su amiga Gianne-Isha Albertoe otro hóben ku a sali for di VSBO i awe tambe tin su diploma di VWO den su man.

Di parti di EXTRA un pabien na tur e hóbennan di MIL ku a risibí nan diploma ayera.