WILLEMSTAD.- Relashoná ku e kaso di aksidente ku morto ku a tuma lugá den oranan di mardugá, polis a duna identidat di e víktima. Manera EXTRA a informá alrededor di 01.53or di mardugá, Sentral di Polis a haña notifikashon ku riba e kaminda Presidente Romulo Betancourt Boulevard a tuma lugá un aksidente di tráfiko. Na yegada di e patruya polisial a topa ku un vehíkulo ku a aksidentá i un (1) herido. For di investigashon ku polis a hasi na e sitio a resultá ku debí na velosidat haltu, e shofùr a pèrdè kontròl riba su stür i a bai dal kontra di un muraya pa despues bai bòltu. E shofùr a keda pegá den e vehíkulo. Debí na múltiple leshonnan e víktima a fayesé na e sitio. Ku yudansa di brantwer a saka e víktima for di e vehíkulo. Pa 02.45 dòkter di polis a konstatá morto di Rachid Erol Sandino Cova, nasé na Kòrsou dia 3 di febrüari 1986. Departamentu di Tráfiko ta kontinuá ku e investigashon. Di parti EXTRA forsa na famianan den e momentunan difísil aki.