WILLEMSTAD.-EXTRA a keda informá pa gerensia di Radio Kòrsou FM i Laser 101 ku e desishon a kai pa no sigui mas ku e dos radionan aki. ‘Despues di fayesimentu di Stella Oosterhof-Priest ya e espíritu no tabata tei mas. Pa e motibu aki tambe a disidí pa no kontinuá i a disolvé e kompanianan”.

Radio Kòrsou FM tabata e promé emisora FM di Kòrsou i no solamente esei tabata e radio ku un potensia super fuerte. Radio Kòrsou FM tabata transmití riba 93.9 ku 25.000 watt di potensia hasiendo posibel ku rònt Kòrsou, Aruba, Boneiru i vários pais mas por a risibi un kalidat di zonido superior. Despues a lanta Laser 101 ku mesora a bira e radio pa mayoria hóben. Algun aña atras Suhandi Oosterhof a fayesé i a laga Stella i su yunan ku a kontinuá ku e radionan. Manera indiká ariba e desishon a kai pa sera ámbos radio.