AMSTERDAM/
ORANJESTAD.- Awe djabièrnè e asosiashon di radionan di Aruba a firma un akuerdo ku e instituto Buma/Stemra na Amsterdam Ulanda. Un akuerdo ku e partidonan a kaba di sera un ratu pasa ta enserá ku e radionan a yega na un fórmula ku Buma/Stemra kuantu nan ta bai paga. E representante di Buma/Stemra i di e asosiashon di radionan di Aruba ta kontentu ku e akuerdo pasobra ta a base di e kantidat di bibienda na Aruba nan lo paga.
E asosiashon di radionan di Aruba a yega na un akuerdo ku Buma/Stemra awe. E representante di Buma/Stemra sra. Casper a bisa ku nan ta satisfecho ku e akuerdo. Ta konsiderá esaki un paso importante den e negosiashonnan ku a tuma lugá i ta spera ku e kantidat di miembronan di e asosiashon di radio lo oumentá. Ku e akuerdo aki e radionan por kumpli ku regla i tòg no ta menasa nan eksistensia. Buma/Stemra ta kobra normalmente a base di e ‘omzet’ di e emisora, pero den kaso ku esaki ta abou ta buska un otro fórmula. Den e kaso di Aruba a opta pa kobra e kompensashon a base di e kantidat di bibienda. Sr. Croes ku a firma na nòmber di e asosiashon di radionan a bisa ku nan tambe ta satisfecho ku e akuerdo pasobra a tene kuenta ku Aruba ta un isla chikí.
Na Kòrsou e asuntu aki a lanta basta preokupashon resientemente despues ku e abogado di Aruba mr. Kock a anunsiá ku radionan aki tambe lo mester bai paga e suma di 3000 florin pa luna. Den kontakto ku Feco Gomez di Asosiashon di Músiko el a deklará na EXTRA ku e no ta na altura mes di e informashon. Gomez a bai tuma kontakto ku e partidonan pa studia e asuntu aki mas profundo. Amak ta pensa mas den direkshon pa wanta un ratu i no hasi demasiado pura ku e asuntu aki. Mester wak bon tur e aspektonan. Buskando mas leu EXTRA a komprondé ku e akuerdo ta enserá ku radionan di Aruba ta bai paga 460 euro pa aña loke ta hopi ménos ku e 3000 florin ku abogado Kock a presentá inisialmente.