WILLEMSTAD.- E outfielder Raïno Coran, a firma ku e organisashon di Chicago Cubs djasabra último. E akto ofisial a tuma lugá atardi na Trupial Inn, kaminda e hungadó a firma su akuerdo ofisial den kompania di famia i amigunan. Ku esaki Raïno ta realisá su soño di firma ku un organisashon di beisbòl profeshonal i lo kuminsá su ruta pa trata na yega Liga Grandi. E outfielder a kuminsá su karera di beisbòl den e organisashon di Koraal Specht, despues el a pasa pa e organisashon di Van Engelen i al final a mira akshon tambe den Royal Scorpions Hubenil. Tabata e èks hungadó profeshonal, skout i coach di e organisashon di Cubs kende ta e yu di Kòrsou Chris Pieters, ku a deskubrí i firma Coran.  Segun Pieters, Kòrsou ta un kashi talento i ku por spera den futuro por bai tin mas hungadó ainda ku por firma. Awor Raïno ta bai Repúblika Dominikana, p’asina kuminsá entrená  i mira akshon den DSL Summer League na e pais. Extra ta deseá Raíno tur klase di éksito i ku pronto e por ta den Liga Grandi. Riba kombinashon di fotonan por mira e momentunan ofisial.