Sentido di urgensia tabata biba na mesa di negoshashon

WILLEMSTAD. - Ramon Chong Presidente di Partido Nashonal di Pueblo i ku tabata na kabes di e delegashon negoshadó  ku Movementu Futuro Kòrsou (MFK)  pa yega na repartishon di ministerio a duna di konosé ku e reunionnan a kana ku hopi sinseridat i tambe hustisia.

Partidonan tabata habrí pa diferente proposishon i opshon subi mesa. E loke ku a sobre salí durante e reunionnan, ta ku e sentido di urgensia.

No tin tempu pa pèrdè i mester kuminsá ku ehekushon riba término kòrtiku, mediano i largu, pues mester atendé tur pareu pa motibu ku awor aki, pueblo ta na turno.

Un aspekto mas ku Chong a a pone atenshon na dje ta e problemátika serio ku Kòrsou ta pasando aden ku presensia di COVID-19.

Chong a bisa ku, nan no tin duda den profeshonalnan den sektor di salubridat públiko. Chong ta kere ku e situashon di COVID aki na Kòrsou ta kritiko.

Refiriendo riba algun pais, Chong a bisa ku ta bon pa aselerá  e proseso di vakunashon. Ta mihó pasa tur dos angua mas lihé posibel i no pasa tur hende un angua pa despues e di dos angua.

Chong ta puntra, dikon ta manten’é e ritmo di vakunashon manera e ta awor aki i ta boga pa aselerá vakunashon mas lihé posibel.

Pa tene e sektor turístiko habrí, Chong a mustra riba e modelo di Dubai. Esta nan a skohe pa un turismo di vakunashon.  E turista ta yega i e ta keda bakuná i e di dos tambe grátis, miéntras nan ta keda dos siman den bo pais. Esaki ta un forma ku por tene e sektor di turismo i hotèl habrí.

No mester lubidá riba e plan nashonal di rekuperashon, mester aselerá proseso esaki tambe.