WILLEMSTAD. – Den luna di febrüari korte di Rotterdam a trata un kaso kontra di e “rapper” kurasoleño Jason L. alias “JayJay” ku na novèmber di aña pasá a keda kondená na 14 aña di prizòn pa komplisidat den un kaso di asesinato, den siman tras di lomba a keda kondená na 9 luna prizòn adishonal, e biaha aki pa labamentu di plaka.

Dia di tratamentu ku tabata na komienso di febrüari, Ministerio Públiko ta di opinion ku JayJay lo mester a laba por lo menos 150 mil euro. Banda di esei ta sospechá  JayJay di maltrato tambe.

Na opinion di Ministerio Públiko, JayJay ta yega na su plaka dor di likidá hende. Ku e plaka aki el a kumpra dos oloshi Rolex ku huntu a kosta mas di 10 mil euro.

E lo a realisá biahenan kostoso pa entre otro Egipto, República Dominicana, Dubai, Jamaica i Kòrsou.

Ministerio Públiko a bai dje leu ei di asta hinka e 3 mil euro ku JayJay a invertí den su djentenan, den e asuntu di labamentu di plaka, loke ku a hasi e abogado di JayJay furioso i a konsiderá e ‘move’ aki komo unu apsurdo. E abogado ta di opinion kon Ministerio Públiko por pensa pa pone plaka di djente riba e lista di labamentu di plaka.

Polis a tuma un asina yamá “Koningsketting” di un balor di 5000 euro den beslag, pero esaki JayJay a bisa ku ta di su primu i no ta di dje. E primu a duna su testimonio ku en bèrdat e kadena ta di su persona.

Esaki a pone ku fiskal a pidi 2 aña prizòn pa e labamentu di plaka i pa ekspropiá 150 mil florin di JayJay, pero el a haña 9 luna di kastigu pa e labamentu di plaka.

Na momentu di e tratamentu i e kondena di siman pasá, ainda JayJay ta pendiente tratamentu di e apelashon di e kastigu di 14 aña sospechá di ta kómplise di asesinato.

Dia 9 di novèmber di aña 2016 den un tratamentu maratóniko Korte a trata e kaso di JayJay akusá di una asesinato kometé dia 9 di mei 2016. E dia ei a likidá un tal Appie di 29 aña di edat.

E dia di asesinato despues ku JayJay i Appie tabata huntu, den un diskoteka, JayJay ta bai Bijlmermeer i einan a tuma kontakto ku Appie pa e yega mas lihé posibel, pa motibu ku e tin tres mucha muhé pa hasi sèks. Appie ta yega, pero ta sali un deskonosí i ta tir’é mata.

E loke ku a inkriminá JayJay den e kaso di asesinato, ta e último ‘app’ nan di kua un di nan ta enkurashá Appie pa yega. E app tabata bisa Appie: ‘bo ta bai yega bro, e muhénan ta bai kas’. Esaki tabata algu pasá di 4’or di mardugá.