WILLEMSTAD.- Korte di promé instansia a trata kaso di e asesinato di e dama venezolano Niloa Delgado Castillo ku a keda asesiná dia 12 di mart último den kaya Silantro.

Polis ku a yega na e sitio, a haña e dama drumí den un kamber riba un kolchon tur na sanger i na su boka. Tambe polis a konfiská un bòter di binager ku tabata habrí banda di e víktima. Despues di a hasi un investigashon, polis a detené e akusado Bonifacio ‘Junni’ Roosje di 64 aña, sospechá di a kometé e asesinato. Segun e akusashon, e hòmber lo a forsageá ku e dama, choké i pone ku el a stek muri.

Roosje ku a presentá den sala di korte, a bisa hues van Lieshout ku e no tin nada di aber ku e asesinato. El a splika ku e tabatin un relashon ku e dama i e djamars promé ku el a fayesé el a mir’é, e no a mir’é mas. El a bisa ku no ta kuadra ku e tabata serka e dama djárason dia ku nan a mat’é. Hues a bisa e akusado ku e mes a deklará ku e djárason promé ku nan a asesin’é, el a papia vários bia kuné na telefòn. Hues a splika e akusado, ku polis a saka afó ku e dia ku nan a asesiná Niloa, e mast di telefòn a mustra ku Roosje tabata 3 ora den área di e bibienda di e víktima.

Roosje a bisa ku e dia ei bèrdat e tabata den bisindario di e dama su kas. El a splika ku e ta drecha outo i un dama ku ta biba banda di kas di e víktima a yam’é pa e wak su outo pe.   Despues di esei el a bai kas. E no ta kòrda nòmber di e dama ku el a bai drecha outo pe.

E dama víktima tabata biba den un kas kual e tabata kuida un hòmber paralítiko. Den e kas tambe tabata biba un otro hòmber di fam Koeiman kual e dama tabatin un relashon kuné. Aparentemente  Roosje tambe tabatin relashon ku e dama. E hòmber paralítiko a bisa ku e anochi ei el a tende un gritamentu den e kas entre e dama ku un hòmber. El a rekonosé e stèm di e hòmber komo di Koeiman.  Despues di un ratu a reina un silensio i no a dura mashá ku Koeiman  a bin bis’é ku e dama a kometé suisidio.

Den e di dos deklarashon e hòmber paralítiko a bisa polis ku e no tin sigur ku ta Koeiman su stèm el a tende. Polis ku a  hasi un investigashon a  haña rastronan di dede  di Roosje na vários parti di e víktima su kurpa. Entre otro na kara, garganta, banda di kurpa robes. Bou di uñanan di e víktima a haña DNA di Roosje. Riba e T-shirt ku e dama tabatin bisti tambe polisnan a haña rastronan di dede di Roosje. Pa loke ta trata Koeiman e tim di investigashon a haña rastronan di dede na dos parti di kurpa di e víktima. Koeiman a bisa ku esei ta pa motibu ku el a trata na bòltu e  víktima ora el a kaba di kometé e suisidio.  E prosèsverbal di polis  a relatá ku na momento ku e asesinato tabata tumando lugá , Koeiman su telefòn tabata mustra den área di Punda.  E akusado Roosje ayera dado momento a bira histériko i a  kuminsá grita ku e no ta esun ku a mata e víktima  paso e no ta hende asina. El a ripití esaki na vários okashon, te ku hues mester a laga sak’é fo’i sala pa e por a kalma un tiki.