WILLEMSTAD- RBC Royal Bank, spònser number 1 di Little League, a organisá un agasaho pa e delegashon di Senior League djarason 11 di yüli den Pizza Hut Salinja. 

E selebrashon a dura 2 ora den presensia di Prensa aya na Salinja.  Direktor di RBC Royal Bank, Pierrot Hurtado, a dirigí palabra i gradisí hóbennan pa nan hazaña di djasbara último, kaminda e ekipo a bira kampion di Karibe di Senior League, biniendo djatras pa gana e selekshon di Puerto Rico den Tio Daou Ballpark. RBC spònser ya pa mas ku 18 aña ta sigui kere den e hubentut di Kòrsou i ta para tras di e hóbennan di e organisashon Little League di Kòrsou. RBC a bolbe pone énfasis ku e hóbennan aki ta futuro di Kòrsou i mester invertí den nan.  E selekshon lo sigui train fuerte pa representá Kòrsou dignamente aya na Easley South Carolina di 28 di yüli pa 4 di ougùstùs 2018.