Tenshon bou di trahadónan

WILLEMSTAD.- E chèns ku mester restrukturá Curaçao Refinery Utilities (CRU) ta real. Esaki debí ku e kompania ta hibando pèrdidá i su aktividatnan ekonómiko pa por generá entrada ta limitá. Ta solamente si logra implementá e akuerdo ku Oryx Midstream, ku awor ta hasi negoshi bou di e number VIGOR, lo por transferí tur aktividat (ekonómiko, finansiero i hurídiko) na Emmastad i Bullenbaai. E situashon di RdK i CRU ta un di e riesgo finansiero grandi pa finansa di pais.

Entretantu ofisina di akountent di gobièrnu, SOAB ku ta akountent eksterno di Refineria di Kòrsou (RdK, awor 2Bays) a kuminsá ouditá sifranan di 2024. Ta antisipá ku den e periodo benidero ta finalisá e rapòrt di ouditoría i ku e kompania lo haña un nota positivo (“goedkeurende controleverklaring”). E situashon ku RdK i CRU ta aden ta sinembargo motibu pa basta tenshon bou di e personal.

Trahadónan ku ainda te den servisio fiho di CRU ta teme ku RdK tin e intenshon di sera e kompania i pasa tur personal pa Vigor. Sinembargo, Vigor lo no mester di tur trahadó di CRU i ta den e kuadro aki ta biba e temor ku lo bai kita mas di e personal for di trabou. A kita kaba trahadónan ku kontrato temporal i ta teme ku e siguiente paso lo ta pa kita trahadónan den servisio fiho.

Mas aleu e trahadónan ta mustra riba e palabrashon ku RdK tin ku e kompania Global Oil Management Group relashoná ku produkshon di asfalt. E palabrashon akí ta enserá ku e personal ta keda den servisio di CRU i ku Global lo hür servisio di e trahadónan serka CRU. Pero segun gobièrnu Global ta indiká ku no tin trahadó kapasitá na Kòrsou.

Gobièrnu den su último reportahe finansiero mensual ta bisa ku e posishon di likides di RdK lo bini bou di mas preshon segun tempu ta pasa. Spesialmente pasobra ainda no a tuma e operashonnan di Emmastad den sentido finansiero. E operashonnan di Emmastad ta kompañá pa gastunan hopi haltu i p’esei ta pisa hopi riba e likides disponibel.

No a antisipá e senario akí na 2024, na momento ku a firma di e kontrato di hür ku Oryx. Ora a firma e kontrato a asumí ku entrante promé di desèmber 2024 lo a tuma operashon kompletu inkluso e parti finansiero. E konsekuensia ta ku tantu RdK komo su supsidiario CRU ta hibando pèrdidá i no por sigui ku e operashonnan aktual pa muchu largu mas, sin ku ta  trese kambio den esaki.

Kontinuashon di e sirkunstansianan aktual (gastu (di personal) haltu i aktividat limitá) den kombinashon ku falta di entrada struktural di kualke tamaño, ta pone RdK den e zona di peliger finansiero pa su kontinuidat. E posishon di likides di RdK ta influensiá negativamente prinsipalmente pa: finansiamentu di 2BAYS na Curoil i kompensashon muchu abou ku Curoil ta paga CRU pa motibu di Plan B3. A informá Curoil di e défisitnan akumulá di vários mion, pero esaki ainda no a kondusí na un solushon efektivo.

Di otro banda RdK no tin entrada signifikante ainda tampoko. Den kaso ku Oryx tuma operashon di Bullenbaai i spesialmente di Emmastad manera akordá, por trese sierto alivio den esaki. Ademas, un komienso rápido di produkshon di asfalt di parti Global tambe lo kondusí na e entrada nesesario, pero no ta spera komienso di produkshon promé ku fin di 2025.