WILLEMSTAD.- Refineria di Kòrsou (RdK) ta firma dia promé di yüli awor un kontrato di hür (“lease”) pa 30 aña ku e kompania Oryx Midstream Private Ltd (Oryx Midstream) pa manehá i operá e fasilidatnan di Emmastad i e terminal di Bullenbaai na Kòrsou. Den e kuadro aki gerensia di RdK i di Curaçao Refinery Utilities (CRU) a invitá tur e personal pa un “town hall meeting” ku ta tuma lugá djaluna 8 yüli na e ManCamp di Refineria Isla.
Durante e enkuentro aki lo duna informashon riba e kontrato di hür (“lease”) ku RdK ta firma promé di yüli awor ku e kompania Oryx Midstream. Representantenan di tantu RdK komo Oryx Midstream lo ta presente pa duna informashon.
RdK i CRU ta yama e kontrato aki ku un durashon pues di 30 aña unu históriko. “Midstream” ta referí na tur aktividat ku tin di aber ku almasenahe, prosesamentu, i transporte di produktonan petrolero.
Den un komunikado interno gerensianan di RdK i CRU ta bisa ku e selekshon di Oryx Midstream ta konkluí un proseso integral inisiá pa RdK na yüni di aña anterior, ku a kuminsá ku un yamada di ekspreshon di interes. Di e 19 respondentenan, a pre selekshoná 7 na ougùstùs segun e informashon presentá.
Despues di evaluashonnan profundo, Oryx Midstream a surgi komo e partner preferensial. A firma un Memorandum of Understanding (MoU) inisial, ku a permití tur dos partido pa hasi inspekshonnan tékniko i diligensia detayá.
“E ‘Memorandum of Understanding’ akí a pone e fundeshi pa e negoshashon eksitoso di e kontrato di hür di término largu. Oryx Midstream ta prepará pa atraé invershonnan supstansial pa Latinoamérika i e region. Ku un eksperensia amplio den atkisishon di energia den sektornan petrolero i gas (“upstream”, “midstream” i “downstream”), i tambe den energia renovabel, Oryx Group ta un aktor stratégiko den e merkadonan prinsipal di krudo na mundu.”
E dia di informashon pa e personal ta nèt 1 siman despues ku hasi e seremonia ofisial pa firma pues e kontrato di hür ku Oryx Midstream. Den e invitashon ku a manda pa asistí na e akto di firmamentu ta bisa ku e kontrato ta un logro signifikante ku ta marka un punto krusial pa futuro di fasilidatnan petrolero na Bullenbaai i Emmastad.
