WILLEMSTAD.- Caribbean Research and Management of Biodiversity Foundation (CARMABI) ta kontentu di por anunsiá ku e trepnan ku kayak den e Parke Palu di Mangel a keda reanudá!

For di òktober 2022 a suspendé temporalmente e trepnan akí pa ta sigur ku e kalidat di awa ta kumpli ku e norma internashonal. Carmabi entretantu a laga tèst e kalidat di e awa. I nos ta kontentu di por komuniká ku for di e resultadonan di e tèst a resultá ku e awa a kumpli ku e normanan. Ta nifiká ku nan por reinisiá ku konfiansa e trepnan ku kayak i ku nos por laga nos  bishitantenan disfrutá atrobe di e naturalesa presioso di e Parke Palu di Mangel. Carmabi lo kontinuá ku e monitòr di e kalidat di awa.

A diseñá e eksperensia úniko aki pa bishitá e entorno di mangel intachabel den e Parke Palu di Mangel, durante kua e partisipantenan ta hasi un biahe fasinante pa e kurason di e ekosistema vital akí.

E puntonan kulminante mas importante:

Eksplorashon di Palu di Mangel: Bai eksplorá i deskubrí durante e biahe di kayak aki e Parke Palu di Mangel for di un ángulo úniko.

Kuentanan Edukativo: Nos guianan eksperto ta kompartí informashonnan/interpretashonnan fasinante di e nifikashon di e ekosistema di e Palunan di Mangel i ta splika dikon esaki tin un papel krusial den mantenshon di e ekilibrio ekológiko di e isla.

Informashon di reservashon: For di awe amantenan aventurero por garantisá nan lugá pa nos trepnan di kayak via e direkshon elektróniko di e Parke Palu di Mangel (Mangrovepark): info@mangrovepark.org.

“E biahe/trep di kayak aki no ta solamente un aventura; e ta un oportunidat pa drenta den kontakto ku naturalesa i pa komprendé kua ta e papel vital ku e palunan di mangel tin den konservashon  di e biodiversidat riku di nos isla”, segun Duvan Rios, gerente di Curaçao Rif Mangrovepark. “Nos ta kontentu di por ofresé e eksperensia aki i ta invitá tantu hendenan lokal komo bishitantenan pa bishitá e tesoronan ambiental den nos propio hardin interior.”

Pa mas detaye di reservashon i mas informashon, mira www.mangrovepark.org.