WILLEMSTAD.- For di dia ku Reda Sosial a wòrdu fundá un di su tareanan tabata di drecha kas pa personanan di ménos rekurso. Dor di pandemia COVID-19 pobresa na Kòrsou a oumentá aun mas tantu. Prinsipalmente den e barionan mas pober, famianan di ménos rekurso finansiero hopi biaha no por hasi mantenshon na nan kas. Espesialmente den temporada di áwaseru, Reda Sosial ta risibí hopi mas petishon pa drecha entre otro dak ku ta lèk y drecha kas ku ta den estado defisiente.

prome di a drecha e kas

Reda Sosial ta un organisashon ku ta ehekutá proyektonan na nòmber di gobièrnu di Kòrsou. Reda Sosial ta risibí su fondonan di gobièrnu di Kòrsou. Ku e fondonan aki Reda Sosial entre otro ta drecha diferente kasnan di e gruponan di enfoke den diferente barionan di Kòrsou. Esaki ta enserá entre otro drechamentu di kosnan básiko di primera nesesidat na e kasnan  di e famianan  mas vulnerabel na Kòrsou. Esaki nos ta yama “Quick Fixes”.

Ta trata aki di por ehèmpel drechamentu di daknan ku ta lèk, pone tualèt i ducha kaminda no tin òf ta den un estado hopi deplorabel, drecha berpùt ku a basha aden i duna e kas un bida dor di pasa un man di fèrf. Pa e hendenan ku tin un desabilidat físiko, Reda Sosial sa traha un fasilidat (“oprit”) pa nan por drenta nan kas mas fásil i nan bira mas mobil.

Reda Sosial ta hasi e trabounan aki ku kontratistanan chikí lokal, ku hopi biaha den dos pa tres siman ta kaba ku e trabou. E bienestar di e famia den e kas ta drecha dirèkt. Den e bibiendanan aki ta biba hopi hende ku ta forma parti di mas ku un generashon. Pa por bini na remarke pa un “Quick Fix” di un kas, bo mester kumplí ku e siguiente eksigensianan. E tereno mester ta riba bo nòmber i e kas mester ta bo propiedat. Tambe mester ta trata di un drechamentu i ahuste chikitu na e kas. Reda Sosial no ta traha kas òf renobá un kas kompletu.

Riba potrètnan por mira e resultado di un di e tantísimo kasnan ku a wòrdu drechá. E kas aki ta den un  bario den área di Banda Abou.

Pa mas informashon di trabounan di Reda Sosial, òf pa wak si bo ta un di e gruponan di enfoke ku Reda Sosial por yuda, bishitá e página di Facebook di Reda Sosial i e wèpsait na www.facebook.com/redasosial i www.redasosial.com