WILLEMSTAD.- Partido MFK i su frakshon den Parlamento ta deseá di baha e belasting ku ta ser kobrá pa tira sushi na Malpais i Koraal Specht, i si por asta duna eksonerashon pa esaki, pero di otro banda hisa e but i sanshonnan ku tin pa tiramentu di sushi den forma ilegal. I e frakshon aki a pidi opinion di SER riba e inisiativa pa kambio dje lei. T’asina ku for di sèptèmber di aña pasá SER a risibí e petishon aki pa duna su konseho riba kambio dje lei. Den e konsiderashon esnan ku a tuma e inisiativa ta ekspresá e deseo, pa evitá tiramentu di sushi den forma ilegal, baha e tarifanan pa tiramentu di sushi na Malpais i e stashon na Koraal Specht òf te asta duna eksonerashon, pero di otro banda hisa e butnan ku ta ser duná pa tiramentu di sushi ilegal.

SER ta bisa ku e tin di suprayá ku tiramentu di sushi ilegal ta un problema serio aki na Kòrsou i ta algu ku mester ser atendé di un forma efektivo i duradero. Tiramentu di sushi ilegal den mondi i kantu di kaminda públiko, tiramentu di kos ku ta sigui bula i tiramentu di sushi na playa ta un fenómeno konosí. Tiramentu di bestianan morto na lugánan aislá tambe ta un problema.

Mas aleu SER ta bisa ku, e tin duda ku a base di e kambionan ku ta ser proponé si realmente esaki lo kondusí na e resultadonan deseá.  E úniko pregunta importante ku SER lo tin den e kaso aki ta, si enberdat tin un relashon kousal entre redukshon di e tarifanan pa tiramentu di sushi na Malpais i Koraal Specht òf dunamentu di eksonerashon, i di otro banda prevenshon di tiramentu di sushi ilegal, manera esaki ta ser menshoná den e proyekto di lei. SER ta puntra su mes asta si e demas kambionan ku ta ser proponé den e lei ta sufisientemente firme pa logra e resultado deseá.

SER ta mustra riba e echo ku esnan ku a presentá e proyekto di kambio aki ta konsentrá prinsipalmente riba problemanan ku esnan ménos pudiente ta konfrontá den petishon pa eksonerashon di e belasting di sushi. Seguidamente nan ta insinuá ku lo tin un relashon kousal entre tiramentu di sushi ilegal i e tarifanan di Selikor pa rekohementu di sushi di kas. E relashon kousal aki no ta ser supstansiá ni probá, no tin sifra ni estadístika pa sostené esei.

Segun SER esei mes te motibu dikon esnan ku a presentá e inisiativa no ta elaborá tampoko riba e nesesidat pa baha tarifanan pa tiramentu di sushi òf pa un ampliashon dje areglo di eksonerashon. Tampoko no ta supstansiá e efektonan ku ta spera for di e kambionan.

Pa SER no ta muchu kla si e kambionan proponé lo surti efektonan positivo i si e ta bai asina leu ku ta akapará e problema di tiramentu di sushi ilegal di forma sufisientemente duradero. E problema di tiramentu di sushi ilegal tin hopi kousa, pues SER ta rekomendá esnan ku a bini ku e inisiativa di lei pa tumando komo punto di salida e kombatimentu di tiramentu di sushi ilegal, nan skohe pa un strategia a base di un análisis amplio.