CARACAS.- E refineria Cardon na Venezuela, e di dos refineria di mas grandi di e pais, tin kuater destillers for di operashon debí na falta di krudo, miéntras ku un di nan tin problema tékniko tambe.

E agensia di notisia reuters ta informá ku CArdon tin un kapasidat di prosesá 310 mil bari di krudo pa dia. Fuentenan a duna di konosé ku e operashon a para debí ku e refineria no a haña krudo.

Un trahadó a informá ku destillersnan ta paralisá. Ta esun promé so tin problema tékniko. Un lider sindikal, Freites a bisa ku ta solamente e ‘catalytic cracking unit’ ta trahando anto asina mes na un nivel di produkshon abou.

Otro informashon ta indiká ku e refineria di mas grandi ku Amuay ta produsiendo 280 mil bari pa dia loke ta hopi bou di e nivel ku Amuay ta produsí normalmente di 645 mil bari pa dia. PDVSA mes no ta dunando niun informashon riba e desaroyonan aki.

Refinerianan na ta pasando momentunan difísil pa loke ta trata nan operashon i segun esnan mas yega na e sektor mester atribuí tur e problemanan aki na falta di invershon, robo i mal mantenshon di e refinerianan. Ta bin aserka ku huida di personal spesialisá for di e pais i e kompanianan ta hasiendo daño tin su efekto riba e operashon.

Na komienso di e siman aki sindikatonan a pone preshon riba gobièrnu di Refineria di Kòrsou ku ta doño di e refineria pasobra na nan opinion e trabounan di e refineria lokal ta paralisá debí ku CRU tin demasiado problema. E sindikatonan a deklará ku nan tabatin kontakto ku PDVSA i ku nan a haña garantia ku PDVSA ta kla pa entrega petroli na e refineria di Kòrsou. Mirando e desaroyo aki na Cardon EXTRA a aserká refineria Isla pero nan no tabatin informashon di loke ta pasando na CArdon.