WILLEMSTAD.- Refineria di Kòrsou (RdK) den un komentario ta indiká ku nan no ta bai duna komentario riba informashonnan den prensa relashoná ku e asina yama “preferred  bidder”, esta e partner ku a skohe pa sigui negoshá kuné pa manehá i operá refineria. Durante di último oranan tin basta komentario a kuminsá sirkulá den e kuadro aki i asta a menshoná nòmber di e kompania Motivá komo esun ku aparentemente lo mester ta e “preferred  bidder”.

Manera indiká RdK den un komentario na EXTRA ta indiká ku loke ta sirkulando den medionan di komunikashon riba e kaso aki ‘ta spekulashon tokante di e nòmber di e potensial partido ku Refineria di Kòrsou (RdK) ta sinta na mesa kuné pa yega na un manehadó i operadó pa nos refineria despues ku e akuerdo aktual terminá na fin di 2019. RdK na e momentu aki no por duna komentario tokante di ken ta e partido aki i mester mantené su mes na e palabrashon ku e partidonan tin ku no ta divulgá nòmber di e partido preferí te na momentu ku por pasa pa firma un akuerdo di entendimentu. RdK i e partido aki ta den kòmbersashon estrecho, trahando dediká, ku e fin di yega na un akuerdo no mas tardá  mitar di yanüari próksimo.”

Mas aleu RdK ta splika ku e proseso di buska i yega na un partner pa manehá, operá i modernisá e refineria ta di sumo importansia pa futuro di Kòrsou. RdK, na un forma diligente, a kana henter e proseso pa yega te kaminda ku ta awe, esta ku tin un asina yamá “preferred bidder”, manteniendo su mes na palabrashon ku terser partidonan. Rdk lo sigui hasi esaki ku e fin di konkluí e proseso eksitosamente na bienestar di komunidat.

RdK por komprondé ku tin un interes ta biba den komunidat pa por yega na un klaridat tokante di e futuro di e refineria.  RdK den mesun rosea ta spera tambe  ku tur hende den komunidat lo sa di atendé ku e proseso na un forma madurá netamente debí na su importansia pe bienestar di komunidat.