WILLEMSTAD.- Un akuerdo ku e konsorsio lokal Corc BV ta prioridat number 1 di e gabinete nobo di futuro promé minister Gilmar “Pik” Pisas. E gabinete ta mira e akuerdo aki komo e piesa prinsipal pa revitalisá ekonomia lokal.

Tambe e akuerdo lo trese algun “spin off” faborabel kuné e gobièrnu nobo ta di opinion. Segun EXTRA tin entendé den e kontaktonan ku tabatin kaba entre Corc BV i futuro miembronan di e gabinete nobo a bin bon kla dilanti ku gobièrnu lo ta dispuesto pa hasi tur loke ta nesesario pa e inisiá ku operashon di e refineria mas lihé posibel.

Esaki no solamente ta nifiká empleo atrobe pa un kantidat di trahadó i kontratista. CORC BV su akuerdonan pa trese krudo ta ku e kompania estatal venezolano, PdVSA i e kompania a indiká ku den kaso logra pone e refineria na Kòrsou funshoná atrobe ku e sèn di sesantia ku falta pa paga e èks trahadónan di Refineria Isla BV tambe lo bini abou. Asta lo t’asina ku estado venezolano a pone e kondishon ku si entrega di krudo na e refineria inisiá atrobe lo atendé alabes ku debenan bieu di InselAir i DAE relashoná ku benta di pasashi na Venezuela.

Otro proyekto ku e gabinete nobo ta determiná pa inisiá kuné ta ponementu di un infrastruktura di kabel fibra óptiko rònt Kòrsou. E kompania ku lo ta enkargá pa pone i manehá e infrastruktura aki ta Aqualectra posiblemente konhunto ku e Curaçao Television & Information and Communication Technology Management NV (CT&ICTM) ku ta e holding ku gobièrnu a lanta pa manehá tur e kompanianan ku tabata kai bou di UTS pero ku FLOW no a deseá di atkerí. Resientemente a nombra eks direktor di Kodela, Ben Statia direktor di e holding aki.

Promé ku benta di e kompania di telekomunikashon UTS tabatin gritunan pa no bende e kompania inkluso e ret di kabel, esta e infrastruktura lokal di telekomunikashon i pa gobièrnu tene esaki den su poder. Entre otro Aqualectra mes a indiká di lo ta dispuesto di mantené i manehá e ret aki. Sinembargo a bende e ret lokal ku FLOW tòg. Aktualmente tin hopi reklamo riba e servisio ku FLOW ta duna i kandidato pa bira minister di telekomunikashon, Charles Cooper na vários okashon a bisa kaba ku den kaso ku FLOW no ta kumpli ku eksigensianan di kalidat lo por revoká su lisensia.

Un otro aria ku gabinete Pisas ta mira ku lo por atkerí fondonan pa hasi proyektonan kuné ta esun di hustisia. Ta pendiente pa sumanan konfiská di tantu e kaso bientu komo e kaso kontra propietario di First Curaçao International Bank, John Deuss yega Kòrsou. Huntu ta kalkulá ku por risibí alrededor di 300 mion dòler ku por sierto lo bai pa e fondo di kriminalidat. E fondo aki sinembargo por hasi proyekto ku sierto meta so, esta pa kombatí kriminalidat.

Otro intenshonnan ku e gobièrnu nobo ke ehekutá riba término kòrtiku ta kambio den e lei di screening ku ya kaba ta den revishon. Tambe e lei di vota di Kòrsou ta algu ku prinsipalmente MFK ta deseá di mira kambio den dje. Pa basta aña kaba e partido, mediante prinsipalmente Charles Cooper ta vosiferá e deseo pa duna tur estranhero ku tin 10 aña òf legalmente bibá na Kòrsou e derecho di voto i kasa asta e derecho di pone nan mes eligibel riba un lista polítiko.

Pèrmit pa karga arma, finalmente tambe ta un maneho ku e gobièrnu nobo mas pronto posibel ke skrudiñá pa asina trese kambio den e esaki konforme liña di maneho nobo ku nan ke kana.