WILLENSTAD.- Refineria Isla ta bai hasi un proposishon pa un posibel prolongashon di su operashon na Kòrsou. Esei EXTRA por a komprondé for di fuentenan yegá na e deliberashonnan ku a tuma lugá den dianan tras di lomba.

Manera ta konosí e situashon di Girobank a kousa un situashon di krísis na Refineria Isla. Si e refineria no por disponé di sumanan depositá na Girobank pago di salario pa fin di desèmber ta na peliger. Den e kuadro aki djárason i djaweps un delegashon di Refineria Isla a reuní ku representantenan di gobièrnu, gerensia di Banko Sentral i gerensia di kompanianan Aqualectra i Curoil.

Miéntras ku a haña un solushon pa e pago di salario pa fin di e luna aki pa medio di aselerashon di pagonan di Aqualectra i Curoil na Refineria Isla, partidonan ta deliberando ainda riba prolongashon di e operashon di Refineria Isla na Kòrsou te ora ku e grupo Klesch por inisiá ku operashon di e refineria. Gobièrnu ta spera di por firma un akuerdo final ku Klesch promé ku aña bòltu, pero e kompania lo no por inisiá operashon mesora.

Pa pasa e periodo transitorio aki direktor interino di Refineria di Kòrsou, Marcelino “Chonky” Delannooy a reuní ku minister venezolano, Manuel Quevedo ku ta alabes gerente general di PdVSA i despues a entregá un oferta na Refineria isla BV siman pasá. Refineria Isla no a duna un reakshon ofisial riba e oferta aki te ainda loke ta un indikashon ku loke Delannooy ta konsiderá komo posibel akuerdo pa Refineria Isla BV keda Kòrsou pa algun luna mas, no ta un senario viabel pa e kompania petrolero.

Konsekuentemente den e kòmbersashonnan ku a hiba den dianan tras di lomba partidonan a bai di akuerdo ku Refineria isla mes lo hasi un oferta ku na opinion di e kompania ta unu muchu mas digno. Prolongashon di e operashon di Refineria Isla na Kòrsou ta di sumo importansia pa na fin di yanüari 2020 kuminsá paga trahadónan di Refineria Isla e pakete di redundansia ku ta kosta mas ku 1.1 miar florin.

Sinembargo e problemanan ku a surgi ku Girobank no ta yuda e situashon pa Refineria Isla. Venezuela no ta gusta e echo ku ta pèrdè parti di nan depósito na Girobank miéntras ku mester sigui manda krudo Kòrsou pa por komersialisá esaki i konsekuentemente Refineria Isla por sigui kumpli ku su obligashonnan.