Balborda: Girobank bèrdat ta un di e bankonan prinsipal di Isla

WILLEMSTAD.- E situashon ku a surgi na Girobank kaminda a tuma desishon pa stòp tur operashon a kousa konsternashon den hinter nos pais. Informashon bankario di kada kliente ta algu priva sinembargo ta públikamente konosí ku Girobank ta un di e bankonan prinsipal di Refineria Isla(PDVSA). EXTRA a puntra bosero di Isla kiko e desaroyonan na Girobank ta nifiká pa Isla. Sr. Balborda a duna di konosé ku te na e momentunan aki Refineria Isla tambe ta sinta den un insertidumbre grandi, sperando di skucha di Girobank kiko tur e desaroyonan aki lo nifiká pa Isla.

Bosero di Refineria Isla Earl Balborda...

Manera EXTRA a informá, for di ayera djamars a sera portanan di Girobank despues ku bastante hende a trata na saka tur sèn ku nan tin for di Girobank. Motibu pa esaki ta ku e banko su situashon lo a empeorá di tal grado ku e no por sigui kumpli ku su obligashonnan. Ta anochi numa Banko Sentral di Korsou i St.Maarten a duna informashon indikando pa kolmo ku ta garantisá te 10.000 florin di kada kliente. Girobank ta supervishon estrikto di Banko Sentral debí na e medida di emergensia riba e banko for di 2013.

Bosero di Isla a mustra EXTRA ku nan no tin informashon di e situashon di Girobank. Isla tin otro banko pero nan lo ke sa ku eksaktitut kiko ta e situashon di Girobank. Pues tur atenshon ta riba loke Girobank/Banko Sentral lo bai splika aki ratu den nan konferensha di prensa.

Buskando informashon mas leu EXTRA a komprondé ku aparentemente ta for di siman pasá surgi un situashon ku Giro lo no por a kumpli ku un petishon di gobièrnu, pero ta parse ku esei no a kousa niun preokupashon serka esnan konserní i responsabel. E kaso di Refineria Isla meskos ku otro kompanianan grandi ku tin nan sèn na Girobank ta sumamente interesante.