WILLEMSTAD.- Ayera un bia mas Regis Djaoen( 41) kondená na bida largu, a bolbe presentá den Hof pa wak kon leu a yega ku e proseso di revishon, pa asina evaluá si e por bin bèk den komunidat.

Resientemente  Hof a manda e tim ku ta konsistí di Reclassering, sikólogo i tambe maneho di prizòn, sinta huntu pa yega na un plan di resosialisashon pa  Djaoen.

Den e kaso di dia 1e òktober aña pasá, Hof a trese dilanti ku Djaoen por bin na remarke pa haña un banchi. Tambe nan kier a sa kon ta pará ku e parti di resosialisashon.

Djaoen aworakí ta den e proyekto di Ministerio di enseñansa, kaminda  detenidonan ta bai traha pafó di SDKK, limpia i fèrf algun skol.

Lo evaluá si ta ta bai amplia su orario pa e ta mas tantu tempu ku su señora esposa. E lo por bishitá su señora na kas bou di supervishon durante dia. Na òktober  binidero lo bolbe evaluá e prosedura i asina wak si Djaoen ta bin na remarke pa drenta bèk den komunidat.

Esaki sigur a kai komo baño di awa friu pa Djaoen, pa motibu ku e no a spera ku e mester bolbe warda te òktober, pa evaluá su kaso. Hof no a duna e fecha eksakto ainda ki dia lo trata e evakuashon den òktober.

Djaoen ta keda akusá di a tira  e bewaker di  fam van der Dijs mata ku su propio arma,  na momentu ku e tabata laborá, na  pòmp di gasolin Gasora, dia 14 di febrüari 1999.

Ku su 21 aña Regis a keda kondená na kastigu di bida largu.

Tambe el a keda akusá pa poseshon di 2 revòlver kaliber 32 i 38, ladronisia di outo di un fiskal i  intento di asesinato riba tres agente polisial, momento ku nan tabata bai hasi su detenshon dia 17 di febrüari 1999.

Na Febrüari aña pasá e kaso di revishon a inisiá debí ku Djaoen a yega 20 aña di kastigu.

Mirando e kódigo penal ku a kambia na 2011, kaminda ta bisa ku mester evaluá e kondenado di bida largu, despues di 20 aña, pa mira si e por bai den libertat, Djaoen a probechá e oportunidat aki pa wak si e ta bin na remarke.

Lei ta bisa 7 aña promé ku e 20 aña di kastigu yega, mester  traha un plan di resosialisashon pa e detenido, bou di guia di Reclassering, sikólogo, sikiater i e personal di prizòn ku tin ku traha un rapòrt di evaluashon. Na òktober binidero Hof lo “toets” si ta kontinuá ku e revishon.