Mercelina: No por drei bèk desishon pa yama elekshon

PHILIPSBURG.- Konseho Supremo Elektoral di St. Maarten ta anunsiá ku relashoná ku elekshon ku ta tuma lugá 19 ougùstùs 2024 e registro di votadó ta sera dia 3 yüni awor. Esaki ta den kumplimentu ku artíkulo 39 di lei elektoral.

Tur esnan ku ta bin na remarke pa vota durante e elekshon di 19 ougùstùs mester tin nashonalidat Hulandes, tin edat di 18 aña i ta biba na St. Maarten for di 3 yüni 2024. Tur persona por tuma kontakto ku Registro Sivil pa verifiká si nan ta bin na remarke pa vota. Den kaso ku tin kualke reklamo por entregá un petishon na Korte di Promé Instansia pa trese kambio den e registro.

Promé minister di St. Luc Mercelina e siman aki tambe a reiterá ku no por para e proseso di elekshon mas unabes ku a hasi un petishon na gobernadó pa konforme artíkulo 59 di areglo di estado di St. Maarten disolvé parlamento i yama elekshon nobo. Vários siudadano i asta polítiko tabata bou di e impreshon ku pasobra parlamentario Kevin Maingrette a bini bèk riba su desishon pa kita su sosten for di e koalishon di URSM, DP, NOW, PFP i NOW ku por revoká tambe e desishon pa yama elekshon nobo i ku e koalishon por a sigui goberná.

Mercelina a splika sinembargo ku esaki no ta posibel. “No por hala e dekreto nashonal aki bèk aden, pues unabes ku a firma i publiká e dekreto aki elekshon nobo mester tuma lugá i gobièrnu den e proseso tambe pa organisá elekshon nobo”, Mercelina ta bisa.

Tambe Mercelina a bisa ku lo no hasi mas intento pa nombra 2 minister mas den e gabinete demishonario. Gobernadó Ajamu Baly a nenga di firma dekretonan pa nombra lider di partido NOW, Christophe Emmanuel i miembro di partido PFP, Raeyhon Peterson komo minister.

Emmanuel pasobra Ministerio Públiko a indiká ku lo tin investigashon andando kontra su persona i Peterson debí na un  sentensia di korte den pasado pa agreshon físiko pa kua e no a haña kastigu.

Peterson ta preparando un kaso den korte kontra desishon di gobernadó i a aserká abogadonan di Kòrsou pa represent’é de esaki.

SAM

Entretantu e partido nobo Soualiga Action Movement (SAM) di lider polítiko, Franklin Meyers a registrá ofisialmente na Konseho Elektoral i lo ta partisipá na elekshon dia 19 di ougùstùs basta ku e partido logra haña sufisiente sosten di firma pa por ta den kontienda elektoral.