WILLEMSTAD.- Den kuadra di kombatimentu di COVID-19 gobièrnu di Kòrsou djaluna último a duna di konosé ku a introdusí reglanan nobo pa drenta Kòrsou via laman. Tripulashon di barku ku ke drenta hafnan di Kòrsou mester mantené un registrashon diario di temperatura i posibel síntomanan relatá na COVID-19 pa tur persona na bordo. Tambe mester entregá un ‘Maritime Declaration of Health’ (MDH) mínimo 24 ora ku nan yegada. Tambe nan tin ku mèldu kualke akontesimentu médiko relatá na COVID-19 durante e estadia aki na Kòrsou inmediatamente. Na final nan tin ku apliká tur medida vigente si tin sospecho di kontagio di COVID-19 na bordo (isolashon/karentena, tèstnan, maneho di karentena, investigashon di kontakto i fuente).

A base di informashon risibí, ta keda determiná si ta nesesario hasi tèstnan di PCR adishonal promé ku e personanan na bordo risibí aprobashon pa baha for di barku. E eksigensianan aki ta konta tambe pa barkunan militar i Wardakosta òf otro barku ku ta kontrolá nos awanan teritorial.

Tripulashon di barkunan privá i barkunan di rekreo mester entregá dokumentashon di tur haf ku a keda bishitá promé ku yega Kòrsou. Huntu ku esaki, mester entregá tambe dokumentashon di eventual pruebanan di PCR ku a hasi anteriormente.

Te kaminda esaki ta posibel, mester yena e Passenger Locator Card (PLC) adelantá. Si esaki no ta posibel, mester yena e PLC direktamente despues ku e barku a yega Kòrsou.