WILLEMSTAD.-  Rei Willem Alexander a papia riba e kontagionan di Corona vírus i tambe e programa di vakunashon. E kombersashonnan aki su mahestat a hiba ku gobernadó sra. Lucille George-Wout i tambe ku e hefe di epidemiologia i investigashon di e departamento di salubridat i ku ta enkargá ku e programa di vakunashon na Kòrsou i tambe ku direktor di Curaçao Medical Center relashoná ku e oumento di kontagionan di e vírus i e programa di vakunashon riba nos isla.

Ultimo lunanan e plamamentu di e vírus i e preshon riba hospital a oumentá drástikamente. Pa por baha e kantidat di kontagionan i tambe e preshon riba hospital, a pone spit tras di e programa di vakunashon. E ambishon ta pa den 10 dia logra vakuna 85% di adultonan, sigur pa e promé shòt. E oumento di e kontagionan na Boneiru i Aruba tambe a subi.

Durante di e kombersashon a duna un splikashon kon ta atendiendo ku e situashon i kontinuashon di e programa di vakunashon.

Pa medio di telefòn i online i kaminda esaki ta posibel, tantu rei Willem Alexander komo reina Maxima ta pone nan mes na altura  i ta duna nan sosten pa e trabounan ku ta keda hasí pa kombatí e vírus di Corona.