Kòrsou sigur tin benefisio ku FOL ta aki

DEN HAAG.- Reino ulandes ta duna su aprobashon pa Merka mantene e Forward Operating Location na Kòrsou pa asina for di e área di Karibe hiba operashonnan kontra trafikashon di droga. Esaki ta nifiká ku e kontrakt ta keda prolongá pa 5 aña mas. E kontrakt aktual ta vense 2 di novèmber 2021 i esun nobo lo tin un durashon te 2026. Premier Eugene Rhuggenaath den un komentario na EXTRA a bisa ku Kòrsou ta na fabor di e prolongashon di e akuerdo aki pasobra e tin benefisionan pa e pais aki.

Den kontesta ku minister enkargá ku asuntunan di eksterior, Stef Blok a duna na Tweede Kamer e ta duna splikashon riba e parti aki. E promé akuerdo pa bini ku un Forward Operating Location na Kòrsou a keda será na Oranjestad riba 2 di mart 2000 i dia 2 di novèmber 2001 el a bira operashonal. Tin un lei di reino ku ta sirbi komo base legal pa e eksistensia di FOL.

Na 2011 i despues den 2016 a prolongá e kontrakt, kada bia ku sinku aña. E akuerdo ta stipulá bon kla ku Merka ta usa e base pa vuelonan di rekonosementu ku ta sali for di Kòrsou i bula den Karibe. E sifranan disponibel ta indiká ku den e periodo 2018 – 2019 e buelonan a yuda ku a konfiská 280.000 kilo di kokaina i 24.000 kilo di mariwana.

https://extra.cw/a-start-proseso-pa-prolonga-base-di-fol-ku-5-ana-mas/