D&D ta move horizonte buska trabou

WILLEMSTAD/

ORANJESTAD.- E kompania di Korsou Dick & Doof, konosí pa nan aktividatnan riba tereno di Isla ta na Aruba e dianan aki despues ku nan a haña un invitashon di parti di Wärtsilä pa partisipá den e destaho pa un proyekto grandi ku ta bai start na Aruba. Na Aruba a start un diskushon den sierto gremio, reklamando e gobièrnu dikon no ta traha ku kompanianan di Aruba so den e proyekto konserní.

EXTRA a tuma nota di algun di e komentarionan na Aruba: ‘Despues di tur loke a pasa ku Citgo i RDA, tur e companianan ku a bati bankarota di Citgo, tur e empleadonan riba kaya sin kobra salario ni sesantia na SVB, awor WEB Aruba ta disidí di duna un kompania estranhero un proyekto milionario na WEB pa proyekto nobo di planta Warsila”.

Relashoná ku esei EXTRA a puntra gerente di Dick & Doof sr. Lito de Freitas pa su komentario. De Freitas a konfirmá ku nan ta na Aruba, pero ku esaki ta riba invitashon di e kompania Wartsila pa asina nan tambe duna preis pa e proyekto di WEB. E no por a duna muchu detaye di Wartsila ni di e proyekto komo ku nan a firma un ‘non disclosure agreement (NDA)’.

Lito de Freitas a deklará na EXTRA ku no tin kontrakt firma ku WEB ni no ta asina ku nan ta negoshando ku WEB. Djaluna último nan a yega Aruba pa reuní ku Wartsila. El a sigui splika ku e planta grandi di Wartsila ku a keda instalá na Korsou resientemente tabata trabou di Dick & Doof i basa riba e bon trabou realisá Wartsila a invitá Dick & Doof pa partisipá i duna preis.

Tin hopi malkontentu na Aruba indikando ku Dick & Doof lo ta trata solamente ku venesolano i colombiano. Riba esaki de Freitas a bisa ku nan ta trahando ku rubiano tantu na Korsou komo na Boneiru i asta na Israel unda Dick & Doof ta trahando tambe awor aki. Tur tres proyekto tin rubiano for di 2007 te awor.

Mas aleu el a indiká ku tempu ku Dick & Doof a traha na Aruba nan a kumpli ku tur lei di e pais. Nan a bai departamentu di labor i a entrevista hendenan ku tabata registrá den e banko di vakatura. D&D no ta evadí e proseso di buska trahadó. Na 2009 pa 2010 D&D a traha riba e proyekto di mas grandi di Salero na Aruba trahando ku kasi 780 trahadó arubiano. Nan a pasa den e proseso i a kumpli ku tur lei, manera un kompania internashonal mester hasi. Pues loke un grupo a kuminsá bisa di D&D na Aruba no ta kuadra pasobra debidamente nan ta respetá tur lei di e pais. Den mesun rosea sr. de Freitas ta indiká ku ta un realidat ku mester buska trahadó ekstranhero, pero esei ta pa motibu ku no tin sufisiente hende lokal disponibel. D&D tin rubiano asta den nan tim di maneho na Korsou.

Finalmente Lito de Freitas a duna di konosé ku nan ta move riba horizonte i ta buska trabou. Nan no ta keda para ketu. D&D ta bai buska e barku i no ta keda para na kantu i wak.