WILLEMSTAD.-Ministerio Públiko den un informe ta pidi yudansa komunidat pa e robo di 600kilo di droga ku a tuma lugá den e anochi di 13 pa 14 di oktober 2018. A pone un rekompensa pa un robo di 600 kilo di droga for di warda di polis na 2018.

Ministerio Públiko (OM) di Kòrsou a anunsiá ku lo duna un rekompensa di un máksimo di 20.000,-florin na esun ku por duna informashon krusial. No opstante e avanse den e investigashon, e tim di investigashon ta buskando mas informashon tokante un kantidat di persona envolví pa por yega na un klousura eksitoso di e investigashon, detenshon di e sospechosonan korekto i trese nan dilanti hues. Pa motibu di e importansia sosial pisá, OM a disidí di duna un rekompensa haltu ku no ta usual di máksimo 20.000,-florin. Si bo ta kere ku bo tin informashon krusial ku lo kondusí na detenshon di sospechosonan o esnan ku a duna òrdu di e robo brutal aki di droga, ta pidi pa drenta den kontakto ku reshèrshi. Por yama òf Whatsapp for di awe na e number +5999 521 3865. Si bo ta preferá di keda anónimo, por yama i duna bo informashon na +5999 679 2896. (foto archivo)