WILLEMSTAD.-  Polis ayera a informá di un rekompensa di 5 mil florin pa e tep di oro ku por yuda den kaptura di e sospechoso Michelangelo M.E. Koster, konosí komo Pollo. E ta ser sospechá di tin un ròl aktivo den e kaso di asesinato na Ser’i Papaya riba dia 5 di yüni 2025, kaminda Sharistone J. C. Melfor Benito a pèrdè su bida.

Riba e dia aki, un hóben di 19 aña di edat a keda likidá den oranan di tra’i mèrdia. E forma kon e hóben a keda asesiná, por papia di un akto di likidashon.

Den kareda di kuartu pa 3 di mèrdia e notifikashon a drenta serka polis di e tiramentu den kaya Meteorológiko. Ora e promé unidat di polis a yega na e sitio a sali na kla ku e hòmber víktima tabata sintá komo okupante den un outo, na momentu ku el a keda alkansá pa tirunan for di arma di kandela.

E hòmber a risibí heridanan di bala na e parti ariba di su kurpa i siendo den e vehíkulo, el a bai buska yudansa na un kas den Kaya Yobida. E intenshon tabata pa bai CMC, pero no a yega leu ya ku el a fayesé den e vehíkulo. Ambulans a yega rápido na e sitio, pero no por a hasi nada mas pa e víktima. Ta trata di e hóben  Sharistone Jonathan C. Melfor Benito nasé dia 26 di desèmber 2005 na Kòrsou.

Na e sitio na unda e tiramentu a tuma lugá, polis a konfiská algun kashi di bala, i algun artíkulo ku ta importante pa e investigashon.

E vehíkulo den kua e víktima tabata, a wòrdu konfiská pa mas investigashon.

Informashon adishonal ku EXTRA a optené ta ku un otro vehíkulo a yega na e sitio, i un persona  lo a baha, bai na e vehíkulo den kual e víktima tabata sinta i a lòs vários tiru riba dje, kual a resultá fatal p’e víktima. Mas informashon ta bisa ku e víktima lo mester a haña un bala den kabes. E forma kon a sorprendé e víktima, i a lòs bala riba dje, por papia di un akto di likidashon. Segun nos a komprondé e víktima lo tabatin apénas 3 siman na Kòrsou for di Hulanda.

Ayera polis a saka e informashon di búskeda di e hòmber Michelangelo Koster. Polis ta hasi un apelashon riba tur hende ku por tin kualkier informashon relashoná ku paradero di e sospechoso.

Informashon ku kondusí su detenshon lo tin komo un rekompensa un suma di 5000 florin pa e tep di oro.

Por duna informashon via di e liña anónimo 108.