WILLEMSTAD.- Relashoná ku e kaso ku a haña e nòmber Hannenberg, Ministerio Públiko i korte di promé instansia, a laga hasi un rekonstrukshon ayera.

Ta trata di e kaso kaminda 2 polis i un miembro di VKC ta keda akusá pa homisidio intenshonalmente, kaminda e víktima Z. Nicasia a pèrdè su bida. Banda di esaki nan ta keda akusá pa maltrato severo i intento di homisidio. Esaki a sosodé dia 27 di sèptèmber 2021.
E 3 akusadonan S.S. (39), H.H. (35) i Y.B. ta esnan ku Ministerio Públiko (O.M) ta pone responsabel pa e loke ku a pasa.

Huntu ku e miembronan menshoná, O.M. ta akusá D.E. (53) ku tin e funshon di “teamleider Unit Speciale Taken na KPC, di a falsifiká dokumentonan den e periodo di 4 di òktober pa sèptèmber 2021.
Segun e akusashon, el a hasi esaki dor di kambia òf falsifiká pruebanan di e suseso i asina evitá ku e bèrdat ta sali na kla.

Tambe e ta keda akusá di a traha un “meldingsformulier” di e polis Y.M. dia 4 di òktober 2021, dor di lag’é pinta un situashon falsu, indikando ku nan a aktua den defensa propio. Asina hasi e tiroteo un echo hustu pa e agentenan.

Segun e dokumento, e polis Y.B. lo a yega tras di e outo i a mira ku e sospechoso sintá parti patras na e banda robes di e vehíkulo, tabatin un arma di kandela. El a bisa di a dirigí esaki riba e agente, miéntras e shofùr den e vehíkulo di fuga a kuminsá kore e outo. Segun e dokumento, e agente Y.B. lo a grita bisando arma di kandela i a kuminsá lòs bala mesora riba e vehíkulo.

Pa loke ta trata e otro polis S.S. tambe Ministerio Públiko ta bisa ku un rapòrt falsu a keda trahá pa D.E.. Segun e dokumento, ora ku e agente S.S. lo a tende Y.B. grita arma, e tambe a kuminsá lòs bala komo defensa propio. Esaki meskos ta konta pa miembro di VKC H.H. Ministerio Públiko ta akusá e “teamleider” D.E. di a hasi mal uso di su poder i funshon, dor di falsifiká e dokumentonan. Durante tratamentu di e kaso ku a keda tratá anteriormente den oudiensia preliminar, fiskal a bisa ku Ministerio Públiko ta pone tur e akusadonan responsabel pa e morto di Nicasia, ku e dia ei a pèrdè su bida.
Esaki despues ku un bala a sali for di un di e armanan reglamentario di un di e agentenan i okashoná su morto.No por a saka afó for di kua di e armanan e bala a sali.

Segun fiskal, e bala a sali intenshonalmente. Tambe e agentenan ta keda akusá di a trata na kita bida di e otro sospechosonan A. Christina i B. Kroonstadt. Esaki dor di lòs un òf mas tiru riba e vehíkulo, miéntras ku nan tabata sintá aden. Durante tratamentu di e kaso na aprel último, e akusado D.H. a bisa ku e no a hasi nada robes.

E agentenan S.S. i Y.B. i e miembro di VKC H.H. tambe a insistí ku nan a aktua den defensa propio. Tur esakinan tabata motibu ku a hasi un rekonstrukshon ayera na kaya Duvert Boy Nicolina kaminda e suseso a tuma lugá. E agentenan tabata tei presente huntu ku nan abogadonan i tambe e wes ku lo bai trata e kaso pa asina tin un bista kon tur kos a bai.

Tur kos a kuminsá dia 27 di Sèptèmber 2021 un atrako armá a tuma lugá den un minimarkert riba dr. Maalweg, pa despues e atrakadónan hui bai den un vehíkulo. Despues di un persekushon na altura di Montaña, e agentenan a lòs un kantidat di bala riba e outo di kual un di e sospechosonan a pèrdè su bida.

Esaki a trese hopi sufrimentu den famia di e víktima i tambe un dia pretu pa e polisnan, segun fiskal. Despues di a hasi un investigashon basta largu OM a wak tur e senarionan di e kaso i a pidi pa persiguí e agentenan pa nan echo.

Segun fiskal, komo polis tin regla i límitenan pa den kasonan asin’aki na Kòrsou. Den e kaso aki, e agentenan a purba tapa e bèrdat dor di dokumentonan falsu. P’esei e agentenan a keda di dagfar pa asina e kaso por keda presentá dilanti korte penal. Tratamentu di e kaso lo ta mañan djabièrnè den oranan di mèrdia.