WILLEMSTAD.- Awe 29 di yanüari 2021 nos ta rekordá e echo ku Hemayel M.A. Martina a pasa pa otro mundu dor di un aksidente di outo.

Ken tabata Hemayel Martina?

Un mucha hòmber ku for di su infansia a mustra interes pa historia di hende i nan desendensia. E tabata hopi interesá den kuentanan di su antepasadonan i a tuma tur oportunidat pa tende i siña di nan, tantu famia na Kòrsou komo na Sürnam. Semper e tabatin kombersashonnan largu ku otro hende pa siña konosé su predesesornan mihó.

For di chikitu el a demostrá talento den deklamashon i muzik. Ku e grupo musikal Karabela el a komponé diferente kansion e.o. pa Arte di Palabra i Festival di Tumba. For di e tempu ei e tabata un poeta.

Na edat hóben el a partisipá na konferensia den eksterior manera National Model UN (NMUN) 2010, na unda el a risibí sertifikado di “Most Outstanding Positive Mind-set Award”. Semper e tabata dispuesto pa kompartí su opinion.

Despues di su estudio na Maria College i St. Paulus VSBO el a bishitá International School of Curaçao i bai sigui studia na Hulanda. Durante su estudio na Webster University na Leiden el a bai Sur Afrika, Natal, pa un periodo di stazje. E tabata mashá stimá dor di su manera di trata i su interes den kultura di e poblashon. Ei e ker a kontribuí na desaroyo di e hende muhé.

Na edat di 20 aña el a bini Kòrsou for di Afrika pa selebrá 60 aña di su mama.

Tambe e ker a hasi uzo di e oportunidat pa lanta su Fundashon i sitanan tabata hasí serka notario pa firma dokumentonan. Lástimamente Hemayel a fayesé riba djasabra 29 di yanüari den un aksidente di outo. Un evento trágiko lamentá dor di hopi hende ku a konos’é i tabata sa di e plannan prometedor ku e tabatin pa hubentut di Kòrsou.

Riba 24 di òktober 2010, riba dia di su di 20 aniversario el a lansa su kolekshon di poesia Ansestro Preokupá Sosegá/ Worried Ancestor, Rest in Peace dirigí na nos avochinan, un compendium di su pensamentunan den añanan anterior.

E buki aki ta ilustrá su amor i interes pa mira un Kòrsou mihó, poemanan interogativo mirá for di perspektiva di antepasadonan.

Personanan ku Hemayel mes a entrevistá òf el a papia ku nan famia pa siña konosé nan mihó pa asina skirbi di nan. E konsepto di e buki ta ku bo ta haña e poesia i un biografia kòrtiku di e ansestro ku e ta kuestioná. Esaki na idioma papiamentu i ingles.

E di dos buki di Hemayel a keda publiká riba 24 di òktober 2014, Na mi manera. Otro kolekshon di poesia kompilá dor di su yùfrou stimá  Kathryn Pruneti i  Sra. Lucille Berry-Haseth. Den su prólogo yùfrou Pruneti ta konta kon el a sera konosí ku Hemayel su poemanan i e ta deskribí e kontenido. Dos tema fundamental ku Hemayel ta uza ta Identidat i Amor. Den vários poema ta riparabel ku pa Hemayel hende muhé no ta solamente fuente di sentimentu, sino tambe e kompañera vital pa kana huntu kuné e kaminda pa sabiduria i emansipashon.

Hemayel ker a logra hopi.

Na final di e buki Ansestro Preokupá Sosegá e ta klousurá ku e pregunta: “Si na otro partinan di mundo mucha/hóbennan tabata indoktriná i fòrsá pa destruí e lugá kaminda nan ansestronan a biba, dikon nan i otronan di nan edat no por ta inkulká i guiá pa yuda konstruí e pais ku nan yunan ta bai heredá?”.

Esakinan tabata pensamentunan di Hemayel. Un manera di pensa ku awor, despues di dies aña, ainda ta vigente. E vishon di Hemayel tabata pa duna hóbennan e oportunidat pa forma nan mes i despues tuma guia.

Su mayornan a tuma e idea di Hemayel i sigui elaborá riba dje huntu ku otro miembronan di Fundashon Hemayel M.A. Martina.

Su plan inisial pa realisá mas ku e hubentut no a kristalisá kompleto ainda. Si a organisá 10 aña konsekutivo plannan di vakashon edukativo pa muchanan di ménos rekurso di instansianan i otro famia. Tur aña e muchanan ta risibí na final di e plan material pa kuminsá aña eskolar. Tambe ta tene un sena di Pasku ku nan.

E espíritu di Hemayel ainda ta bibu den komunidat. Mas i mas hende ta preokupá nan mes pa bienestar di otro i dia pa dia ta mira mas hóben ku na un manera positivo ta kontribuí na formashon di hóbennan di nan edat, hóbennan ku tambe ta soña di un Kòrsou mihó i ku den sierto kasonan ta afiliá na gruponan polítiko.

Nos ta spera ku e rekordatorio aki lo sirbi komo fuente di  inspirashon i motivashon pa mas hóben lesa su poemanan, stima nan isla mas i duna nan aporte na progreso di Kòrsou.