WILEMSTAD.- Frakshonnan di partido MAN i PAR a manda un rekordatorio pa presidente di parlamento, Charetti America-Francisca pa e reunion públiko ku a pidi ku urgensia riba e tópiko di eksonerashon di debe di impuesto pa mas ku 3 miar florin.

Ta for di 20 ougùstùs frakshonnan di PAR i MAN a manda un petishon pa yama un reunion ku karakter di urgensia riba e tópiko aki, konforme artíkulo 64 di reglamento di órden. Motibu pa e petishon ta e echo ku den e reunion di Komishon Sentral di parlamento di 19 ougùstùs minister di Finansa, Javier Silvania no a duna e klaridat deseá riba e base legal di su desishon pa eksonerá mas ku 3 miar florin na debe di impuesto.

Tampoko e minister a duna klaridat riba e proseso di tomo di desishon ku a tuma lugá den Konseho di Minister, di akuerdo ku e frakshonnan. “Minister a nenga di duna parlamento bista den e respektivo konsehonan di su ministerio riba e tema”, e frakshon ta skibi den su karta di rekordatorio.

Despues di 1 siman ku a pidi presidente di parlamento pa yama un reunion públiko ku e minister di Finansa, MAN i PAR a disidí di manda un rekordatorio pa America-Francisca pasobra e frakshon no a haña respondi ainda di presidente. “Un súplika ta bai na bo persona komo presidente di parlamento pa konvoká e reunion públiko aki konforme reglamento di órden. Pa finalisá, demokrasia di nos pais lo no ta sirbí ku akshon di keda sin konvoká e reunion”, e frakshon ta skibi.

Na komienso di e ora di pregunta di djaweps 29 di ougùstùs, lider di frakshon di MAN, Giselle Mc William a puntra presidente di parlamento kon a para ku e reunion públiko ku a pidi for di siman pasá 20 di ougùstùs i ku konforme reglamentu di órden di parlamento America-Francisca mester a yama kaba. America-Francisca a kontestá Mc William bisando pa keda pendiente pasobra e lo a sinta ayera mes ku griffier pa hinka agènda di reunion den otro.

E presidente di parlamento a referí na susesonan di último dianan ku a stroba e reunionnan di parlamento tuma lugá, pero ku ta bai traha un planifikashon nobo. Ku susesonan di último tempu America-Francisca a referí na e krísis den gabinete Pisas II pa haña sosten nobo di parti di frakshon di KEM i miembro independiente, Zita Jesus-Leito.

E sosten aki tabata nesesario pasobra frakshon di MFK den parlamento no ke a sigui traha ku parlamentarionan di Partido Nashonal di Pueblo (PNP) Sheldry Osepa i Gwendell Mercelina ku e konsekuensia ku PNP a kita su sosten for di gabinete Pisas II.

Foto:

...Giselle Mc William...