...Bomberonan pagando e kandela na e dos kasnan na Juan Domingo bij Mahuma...

WILLEMSTAD.- Ayera nochi den kareda di algu pasá di 10 or, brantwer a bai ku urgensia pa dos kas i outonan ku tabata na kandela.
A resultá ku e kandela tabata na e dos kasnan kaminda ayera mainta e pleitu a surgi i ku a terminá den asesinato di Almier Godett. Pues na e adrès Juan Domingo bij Mahuma. Na yegada di brantwer a topa ku dos kas, un tiki leu for di otro ku tabata na kandela. E kandelanan tabata basta fuerte, ya ku por a mira ku e kasnan a kima kompletamente parti paden. Un dje kasnan hasta a haña sker mahos. E kasnan tabata habitá.
Dilanti un dje kasnan tabatin kuater outo stashoná, nan tambe a keda pegá na kandela. E vehíkulonan a kima por kompleto.
Na mes momentu tabatin mèldu ku a pasa basha bala riba e kas dje sospechoso di asesinato di Godett, den Mahuma Kaya O.
Outoridatnan ta investigando e kasonan aki tantu e kandela komo e bashamentu di bala.

https://extra.cw/pleitu-ta-termina-den-asesinato-di-almier-godett/