...Anthony Godett, kandidato number 2 riba lista di partido KEM...

WILLEMSTAD.- Partido KEM (Kòrsou Esun Mihó) no ta di akuerdo ku intervenshon di Ulanda na Kòrsou relashoná ku e impase ku a surgi den parlamento. Parlamentarionan di “oposishon” no ta bai reunion p’asina no trata kredensial di un miembro di partido PAR ku mester drenta den parlamento.
Sr. Anthony Godett, kandidato number 2 riba lista di KEM na nòmber di lider di partido, a para ketu na e situashon ku tin aktualmente den parlamento. El a bisa ku partido KEM lo kambia e reglamentu di órden pa evitá ku esaki ta sosodé.
Tambe den e kambionan ku lo keda proponé despues di tres periodo di gobernashon ku a trata di kambia reglamentu di órden, esaki no a logra, enbes di hasi dos siman, pa un reunion públiko pa tuma lugá, e tin di bira 7 dia igual ku tempu di Konseho insular. No ta kuestion di dos siman i biahamentu, pero miembronan di parlamento tin di traha. Nan tin di sinta na Kòrsou i traha e trabou pa loke nan a keda elegí p’e esta traha pa empleo, pa ekonomia kana, i den e kaso aki pa e pobresa keda ataká, solushoná i pa finansa keda na un nivel korekto den pais.
E loke ku promé minister sr. Eugene Rhuggenaath kier hasi di bai Ulanda pa pidi intervenshon den situashon di parlamento, apesar ku KEM no a tende su resultado ainda, i si a yega na un akuerdo pa pidi Ulanda pa intervení den nos asuntunan lokal, no por.
Si por a skucha deklarashon di promé minister, e ta bisa i aseptá ku Kòrsou no tin gobernashon. Promé minister Rhuggenaath mes ta bisa ku e no por goberná i p’esei ta bai pidi Ulanda yudansa. Partido KEM ta kontra di kualke intervenshon di Ulanda den nos pais.
“Kada partido ku tin problema interno nan tin di solushoná esaki den nan mes seno. Pais no por bira víktima di sierto partido. No tin espasio pa Ulanda bin intervení den nos asuntunan, falta 3 siman pa elekshon, Ulanda no mester bin atendé den nos asuntunan. Ulanda atendé ku e situashon di Corona na su pais”, segun sr. Godett.
Finalmente el a bisa enbes di bai Ulanda, gobièrnu mester subi trapi bai serka gobernadó entregá retiro, meskos ku na Ulanda, kaminda premier Rutte a entregá retiro di su gabinete i ta demishonario, debí ku e gabinete a kai.