Update:

Tur informashon ta den desaroyo i te na e momentunan aki Divi Air i ZAir ta bulando pa Aruba i Kòrsou. Tambe buelonan internashonal ku ta pasando den espasio aéreo di Kòrsou ta tumando lugá.

WILLEMSTAD – Relashoná ku e akshonnan militar merikano den oranan di mardugá awe na Venezuela den kual nan a kaptura presidente Maduro, tur tres kompania di aviashon KLM, TUI i Corendon a anunsiá ku ta kanselá nan buelo awe pa i for di Kòrsou.

Informashon adishonal ku ta drentando ta ku aktualmente no tin  ningun buelo ta bulando riba Kòrsou.

Gobièrnu di Kòrsou a tuma nota di e desaroyonan na Venezuela for di oranan di mardugá i ta den kontakto estrecho ku partnernan lokal i den Reino.

Un yamada na komunidat pa nos keda trankil i sigui kanalnan ofisial di Gobièrnu di Kòrsou.

Deklarashon di Corendon

WILLEMSTAD - Debí na e situashon den Venezuela, Corendon mester anulá buelo CD5989 di Amsterdam pa Curaçao dia 3 di yanüari.

Tur pasahero lo risibí nan sèn bek. Nos ta hasiendo tur trámite pa informá tur pasahero.

Pa e pasahero riba buelo CD5990 di Curaçao pa Amsterdam, ku ta sali awe dia 3 di yanüari, Corendon a regla un estadia. “Nos ta hasi tur esfuerso pa yuda tur hende ku por yega na nan destinashon tan pronto ku e situashon lo ta permití. Nos ta sigui e situashon ku atenshon i ta en kontakto ku tur e outoridat ku ta envolví.”