Relax i Divine Sensual Massage, ban tende kuantu kos nan ta hasi. Suly Girigorie (53) ta den e negoshi Relax pa 14 aña kaba, un trayektoria basta largu. E no a kuminsá na e negoshi Relax, pero el a studia na Ulanda, diferente estudio por sierto i a spesialisá su mes den loke el a mira ku tabatin merkado pe. Suly ta soltero i no tin yu i Relax ta su beibi. Den prinsipio hopi hende a haña straño ku un hende muhé ku un sèks shòp i pa kolmo yu di Kòrsou. I el a tende basta komentario no masha agradabel pero Suly a perseverá te kaminda e ta awe. E ta kibrando e tabú dor di papia abiertamente di sèks i uso di “toy” pa satisfasé bo mes.

Dikon hasié skondí...

“Ami semper ta gusta kosnan inovativo i ‘challenging’. Mas difísil e ta, mas leuk”, asina Suly a komentá riba e pregunta kon bini e den e tipo di negoshi ku e tin aki. Relax ta un “toy” store. Toy pa hende adulto i manera e splikashon ku Relax ta duna riba su página di FB ta bisa “ den bida tin biaha nos mester di un yudansa. Tin biaha e yudansa aki lo mester ta relashoná ku nos bida seksual i íntimo i Relax por duna un man den esaki”. Segun Suly basta aña pasa el a mira e buraku den merkado. Tin hende tabata hasié tras di kortina, na nan kas skondí skondí, pasa patras di kas pa haña algun kos. Pero Suly kier a hasié diferente. Dikon no un tienda pa hende yega i haña un surtido amplio i ku informashon pa nan sa di nan bida personal. Asina el a purba. I e no kier a hasié chikí pero a bai mesora den grandi. Den prinsipio tabata algu kontradiktorio i un reto. Na Kòrsou tin e tabú i kosnan skondí i esei Suly kier a kita, “Mi ta haña ta algu ku nos tin di aber kuné diariamente, esta seksualidat i dikon e mester ta skondí. Tanten bo ta ehersé sabiamente i ku e persona korekto, ta dikon e mester ta skondí”, Suly a opservá. I si tin un hende ku por yuda bu haña informashon, dikon no. I p’esei e tienda Relax ku tei kaba pa 10 aña.

No tin bèrgwensa...

Den prinsipio Relax tabata situá na Esperamos. El a skohe e lokashon pa haña e hendenan tòg den nan komodidat.  Teniendo na kuenta e tabú a bai ariba, ku glas skur. Hendenan tabata parker na Esperamos i kana yega aserka. I tabatin hende tabata asta hasi bestelling na telefòn i nan tin di baha i hiba esaki na outo. 4 aña pasá a bai Mon Repos. Pa e privasidat e ta poko habrí ounke ku su privasidat. I ku tempu tambe hende a bin komprondé ku esaki no tin niun klase di bèrgwensa mará na dje.

Tin hende ta pensa ku si nan kolega mira nan ei den, kiko e lo pensa. Pero kiko e kolega tambe ta hasiendo ei den? Apesar di tur eseinan e negoshi a bai bon. Nan tin tur tipo di kliente pero di 18 aña bai ariba. Tin hende grandi, hende yòn, hende muhé i hende hòmber tur i tambe di tur nashon ta bai buska nan produkto. I tin hende sa i otro no sa i p’esei Suly a sòru pa e empleadonan di Relax ta bon informá pa por duna e informashon ku e kliente tin mester. “E ta importante pasobra no ta pan nos ta bende. Tin hende ta yega i haña algu ku forma straño i ke sa ta kiko e ta. E hende mester haña informashon pa skohe korekto”. E demanda pa Relax su produktonan ta hopi haltu i no ta pòrnada nan tei 10 aña kaba den merkado, den tur e situashon ekonómiko malu. E tambe ta sinti un reseshon ekonómiko pero e por drei su negoshi ainda. I den situashon ekonómiko difísil hopi biaha hende ta buska entretenimentu. I e nightlife a bira slou i bo tin di ‘enjoy’ bo mes na kas ku bo pareha. I esei ta loke Relax sigur por duna un man kuné.

Konseho i masashi....

Banda di e negoshi Relax ku ta bende produktonan pa yuda nos bida íntimo i seksual, tin tambe e parti di Divine Sensual massage kaminda un di e produktonan ku ta ofresé ta konseho na e kliente. Suly ta konsehero di sèks, e ta terapista i e ta edukadó seksual dunando lès na skol i tayernan privá i den públiko. “Ora un hende bin serka mi ku un problema den su bida seksual, mi ta bai profundo pa buska pa sa ta dikon”, Suly a bisa Djasabra.

I den mayoria kaso a resultá ku e problema no tin nada di aber ku su bida seksual. E problema ta bin haña un forma kompletamente diferente pa asina yuda e hende bira mas mihó.

Suly a spesialisá i profeshonalisá su mes den e área seksual i di konseho. El a hasi esaki na Ulanda kaminda el a kore stazje tambe pa e ta sertifiká.

Inseguridat problema di matrimonio....

Un di e produktonan ku tambe e ta ofresé ta konseho/intermediadó di matrimonio. Problema di matrimonio manera Suly a splika, hopi bes tin di aber ku e inseguridat di nos hende muhénan ku ta keda tene abou dor di e manera di wak kos di e hende hòmber. Deskonfiansa masha grandi. Hende hòmber tambe ta bai buska yudansa. “Dia mi a kuminsá ku counseling mi a imaginá mi ku lo mi a haña mi mas tantu ku hende muhé ku lo a bin serka mi, pero tabata kontrali, hende hòmber a bin aki. Mi ta kere nan a haña nan espasio pa ‘uit’ nan mes, sin prehuisio”. Den kaso di hende hòmber hopi biaha e problema ta sinta den e deskonfiansa ku nan ta kana kuné i asta e echo ku nan ta wòrdu usá i nan no por dil kuné. Usa den sentido ku nan por haña hende muhé ku nan ta bira lokamente enamorá di dje i ora nan ta lokamente enamorá nan ta duna i duna pero nan ta ferwaktu algu bèk tambe i no ta haña esaki i nan no sa kon dil kuné. I nan no por bai tuma konseho serka niun amigu, dor di bèrgwensa i nan ta bai serka Suly pa konseho. I e ta yuda pa e hende hòmber pero pa e hende muhé tambe para riba su mes pia.

“Dushi ora mi logra”....

I e sentimentu ku e ta haña ora e logra den pareha ta “heerlijk, algu satisfaktorio ku mi no por splika”, asina Suly a tipifik’é. E ta kòrda un di su promé pareha tabata hende grandi. Nan tabata biba separá i e amor tei pero nan tin hopi ‘issue’ pa motibu di distansia i yu. I ora nan a siña komprondé ku den sierto kaminda di bida e ‘issue’ nan ei no ta konta mas pero ta nan dos ta konta, por mira kon e amor ta krese mas. Esaki ta un sentimentu masha dushi ku asta Suly por bira yalurs di dje pasobra e tambe lo ke esei. “Mi no ta un rèfri pasobra tin hende ta bin i kere ku mi ta bai tuma parti. Kualke sea e tópiko i kua desishon ku bo a tuma despues di e counseling, ta esei mi ta para su tras. Nan mester sali satisfecho ku otro i e desishon ku tuma”. Esei ta e promé kos ku semper e ta duna.

Asta hóbennan di 18 aña ta buska konseho...

I no ta solamente hende di edat Suly ta intermediá den nan relashon pero e ta haña asta pareha di 18 aña ku ta bai serka dje. Esei ta un edat hopi yòn pero e ta sabi pa duna counseling for di awor. I p’esei tambe Suly ta hasi pre-matrimonio pa e pareha siña konosé otro mihó promé ku nan drenta e enlase matrimonial ei. I asta einan nan ta bin ku problema kaba.

No espektativa....

Den un relashon ta importante lo siguiente.....si bo ta bai drenta un matrimonio no drenta ku espektativa. Esaki ta trese desapunto. Hopi bes un hende muhé tin vishon di prens den kabes, pasobra ta asina nos a lanta i bo ta pensa ku e hende hòmber ta trese e kos ei pa bo i e ta bo alegria. I ora bo no hañ’é bo ta haña desapunto i ta kulpa e hende ei. I bo ta  keda den e ping pong ei, Den un relashon bai ku kurason habrí. Ora bo sali di un relashon no drenta un otro mesora pasobra bo ta bai ku bo problemanan di e promé relashon pa e relashon nobo.

Forma bo yu seksualmente for di chikí...

Suly ta bishitá skolnan tambe kaminda e ta duna e formashon seksual. Esaki ta sosodé bou di e fundashon “ami ke sa”. E ta kuminsá for di mucha di 2 te 16 pa 17 aña. E ta kuminsá tempran pasobra ta bon pa eduká e mucha na su edat i ku ta klòp na su desaroyo i no ta meskos ku e splikashon ku ta duna esun di 16 aña. I un mucha chikí di 2 aña hopi biaha ta den presensia di su mayornan. Den skolnan ta muchanan di 12 aña bai ariba i einan e ta papia di kambio di nan kurpa, kiko ta pasa ku nan hormonanan i kiko nan por ferwaktu ku ta bini. I ora nan subi mas edat ta bai mas serio di uso di kondon, embaraso etc., etc. Suly ta bishitá skolnan hopi pero tambe e ta duna lèsnan privá di pubertat i tambe ta duna lèsnan privá na kas. E tayernan ku e ta duna ta pa hende grandi tambe. Nos a lanta den un tabú ku hopi hende no sa hopi kos i p’esei e ta duna e informashon pa hasi e bida seksual un poko mas mihó. I e demanda pa e konsehonan i tayernan ta hopi grandi. “Mi mannan ta yen”, asina Suly a enfatisá.

Importante pa komprondé....

“Den bo bida personal abo tin di hasié leuk, abo tin di sòru pa satisfasé bo mes. Ora bo ke yega na bo punto máksimo ta dependé di abo i no di bo pareha. I imaginá bu bo no tin pareha, abo tin di sòru di sinti bo mes bon, sea kualke sea e ‘toy’ ku bo a skohe pa satisfasé bo mes i siña konosé bo kurpa pa asina bo por trese bo deseo over na e otro persona”, palabranan kla di Suly Girigorie.

Relax i Divine Sensual Massage
   Mon Reposweg 72 A i B