WILLEMSTAD.- E remodelashon di Marshe Bieu den Punda ta resultando den un debakel. Ayera tabata promé dia ku e marshe a habri pa públiko i ya kaba a konstatá problema serio den e konstrukshon.

Ta hopi yamada redakshon di EXTRA a risibí ayera di klientenan malkontentu. Entre otro e reklamonan ta ku e infrastruktura nobo di Marshe Bieu no ta tene kuenta ku hendenan ku ke tuma kuminda pa bai kuné.

Mester para den reinan largu i no tin lugá adekuá pa hasi esaki.  Mas aleu tin reklamo di holó stinki i un sistema di kloaka ku aparentemente no ta traha bon debí ku e pòchinan di wc ta basha awa.

E reklamonan aki sinembargo no ta e pió ku por a pasa. Asina ta ku e fòrnunan di "baksteen" ku a traha pa kushiná aden a baster ayera.

E promé biaha ku a usa e fòrnunan aki ya a sali fayo grandi afó ku mester buska solushon purá pe sino mester stòp di usa e Marshe Bieu atrobe. Kòkinan ta konfirmá ku for di e promé dia ku a usa e fòrnunan ku esakinan a haña sker loke ta prueba di fayo den konstrukshon.

E fòrnunan no por ku e kayente ku e karbon ku ta kushiná riba dje ta generá. Tambe tin reklamo ku e kayente tras di e fòrnunan ta demasiado i ta hasi práktikamente imposibel pa para kushiná tras di nan.

Banda di esaki e trahadónan mes ta konfirmá reklamo di klientenan ku lo tin vários otro asuntu mas di e konstrukshon ku no ta bon. Entre otro ta mustra riba e sistema di desague ku no ta bon. E awa no ta bai i tambe e flur lo no ta bon bashá di forma ku e awa no ta kore bai di su mes kaminda e rosternan di awa ta.

Mester buska un solushon lihé pa e situashon ku a surgi. Entre otro mester papia ku esnan responsabel pa e remodelashon pa wak kon ta bai drecha tur e diferente problemanan ku tin.