WILLEMSTAD.- Renaissance Curaçao Resort & Casino a manda su personal kas ku pago i sin ku ta pèrdè nada di nan fakansi. Pa Renaissance Hotel e trahadónan su salú ta masha importante, esei ta loke nos a komprondé di Angelo Martes direktor di rekurso humano i Corporate PR di Renaissance Curaçao Resort & Casino.

Den entrevista ku EXTRA sr. Martes a splika ku for di momentu ku a sali na kla e asuntu di e vírus aki, nan a sòru pa tres seshon di informashon ku dr. Izzy Gerstenbluth pa e personal i pa lidernan den nan organisashon pa asina nan por ta prepará.

Sr. Martes a sigui bisa EXTRA manera maneho  tuma nota di e desaroyonan mundial nan a tene diferente reunion interno, for di wikènt pasá e presidente i CEO di Wind Creek Hospitality ku ta kompania doño a manda 2 karta pa tur empleado. Un di e kartanan tabata e parti edukativo di e parti di vírus kon pa prevení, kiko ta e pasonan ku tin di tuma di akuerdo ku nos leinan lokal. E otro karta ta e diferente senarionan ku por tin, dependé tur kos a desaroyá.

Un deklarashon kla na e personal ta ku nan no tin di preokupá nan mes ku salario. E promé kos ta nan salú. A tuma pasonan inmediato for di wikènt siman pasa kaminda djaluna siman pasá a reuní ku tur ehekutivo i kaminda a identifiká tur e personal ku ta 60 aña bai ariba i ku ta den e grupo di riesgo a keda mandá kas i ku pago.

Esaki nan a titulá “leave of absence with pay”. No ta kita nada for di nan fakansi, ta simplemente e personal ta haña liber ku pago. Tambe e personanan ku debí na nan salú ta kai for di den e grupo di riesgo a bai kas for di djaluna siman pasá, tur esaki pendiente desaroyonan. Esaki ta te dia 30 di mart i pa e dia ei lo bolbe reuní ku hefenan di e kompania pa un ‘update’ riba e delaster desaroyo i wak kon ta sigui. Nan lo sigui monitòr e situashon di aserka pa asina tene e personal na altura.

Angelo Martes a sigui bisa ku un parti masha importante di e proseso ta e komunikashon. Diariamente e tim ehekutivo ta reuní, ku mènedjernan i nan na nan turno ta reuní ku e personal.

Tambe a sera e kasino temporalmente te próksimo aviso. Esaki ta dor di djamars siman pasa i Starbucks ta parti di e totalidat i esei tambe nan a sera for di djabièrnè pasa.

Renaissance tin den servisio 500 persona. Aktualmente mayoria a bai kas i tin algun trahando pa e parti di seguridat entre otro. E parti ku a tene na minimal ta pa tene e operashon entre otro e seguridat ku ta full ekipá, e parti di kámara tambe ta full ekipá i e otro partinan operashonal ta minimal. Na ‘frontdesk’ tin algun trahadó pasobra ainda tin algun wéspet. E último wéspetnan lo mester sali awe i básikamente e hotèl lo ta kompletamente bashí.

Renaissance a pasa den renovashon grandi. E loke nan a pone pa e renovashon na yanüari gran parti tabata kla i awor tin di bin e siguiente fase i tin algun kos ku tin di sigui manera e Ballroom ku ta den e plan di e aña aki.

Pa loke ta e negoshinan den Renaissance Mall segun Angelo Martes praktikamente mayoria ta será. Kisas aki i aya un ta habrí pero praktikamente nan ta será.

E situashon aki segun Angelo Martes a siñ’é ta ku ni opstante kon duru algu bin riba bo, komo organisashon bo tin di mantené kalmu ku ta pro aktivo. E bentana ku nan tin ta ku e kompania doño ta kere den su personal. E kompania madre ke pa sòru bon pa e personal. I pa 3 luna sigur e personal no mester preokupá. Ta algu grandi kaminda promé wak operashon ta wak e hendenan. Esei ta un di e balornan importante di Wind Creek Hospitality ku realmente demostrá e balornan ku nan ta para pe. Esaki a mishi ku e personal, nan a apresi’é masha hopi mes. Angelo Martes a bisa ku nan ta hañando ‘feed back’ di e personal. Ta algu grandi di un empresa ku ta kere den su hendenan.

Tambe el a pidi pa nos hendenan stòp ku e notisianan falsu ku ta bai rònt. Por ehèmpel a saka riba Facebook ku na Renaissance tambe tin trahadó kontagiá ku e vírus. Esaki no ta kuadra ètòl ku bèrdat. Mester atendé e kosnan serio i na forma responsabel.

Angelo Martes ta pidi pueblo pa tuma e kos aki na serio. Si mira nivel mundial e negligensia ki efekto e tabatin ta algu inkreibel. Ku pasonan apropiá i determinashon pa purba kontrolá e situashon mas tantu posibel, i nos disiplina lo evitá ku nos ta bai den ‘toque de queda’.