WILLEMSTAD.-Reorganisashon di servisio di impuesto kombiná ku yenamentu di vakaturanan ku hendenan kapasitá pa hasi e trabou nesesario den impuesto i den mesun rosea lo atendé awor si ku e sistemanan outomatisá ku ta stroba bon funshonamentu di servisio di impuesto. Gobièrnu di Kòrsou tin aprobashon preliminar pa loke ta trata e siguiente tranche di sosten di likides for di Hulanda. Manera ta konosí ta trata di un suma di 92.5 mion ku Hulanda ta pone disponibel. Sinembargo esaki tambe ta mará na kondishonnan fuerte. Konseho di Minister den su reunion di djabièrnè, último 30 di yüli, a aprobá un agènda ku palabrashonnan ku ta konta pa e siguiente kuartal, asina minister di finansa mr. drs. Javier Silvania a deklará na EXTRA.

Den kombersashon ku e titular di finansa el a duna di konosé ku reorganisashon di servisio di belasting ta algu urgente. A stipulá e fecha ku pa sèptèmber próksimo mester entrega Hulanda un plan di akshon kon ta bai reorganisá e servisio. Ya kaba Hulanda a indiká di ta dispuesto na finansiá e proseso aki.

Un di e aspektonan hopi importante ta un edifisio nobo. Un edifisio unda por ubiká tur òf mayoria servisio ku ta kai bou di e ministerio aki. E desishon ei ta sòru pa mas efisiensia i ta skapa hopi plaka ku awor aki ta bai na hür di edifisionan. Gobièrnu a enkargá Sherwin Casper direktor di BAB ku e parti aki.

A fiha un presupuesto di alrededor di 100 mion pa e edifisio aki ku mester bini na Regentesselaan mes atrobe. Ministerio di finansa tin edifisionan den Punda ku eventualmente lo por bende i asina ta generá e fondonan nesesario. Minister Silvania ta kere ku den un periodo di 4 aña e edifisio nobo mester tei.

Otro punto krusial ta e echo ku servisio di belasting tin hopi vakatura. Ultimo añanan trahadónan a bai i no a remplasá esakinan. E servisio ta traha ku uitzendbureau i minister Silvania a konstatá ku Tempo Uitzendbureau tin hendenan 8 aña ta traha pa e ministerio. Na opinion di e mandatario esaki no ta manera pa trata ku hende, ademas e no ta bon pa e organisashon di belasting tampoko. E hendenan ei no tin seguridat di trabou i ta pone ku nan no ta duna tur loke nan tin.

Riba e pregunta di EXTRA kon ta splika e diskushon di último añanan ku mester redusí ámtenar anto awor e ministerio aki ke tuma hende den servisio atrobe, e mandatario a splika ku e ta bai pèrkurá ku ta tuma hendenan den servisio i sòru pa bon entrenamentu di nan. Kada trahadó bon di train ku hasi su trabou i gana un salario desente lo pèrkurá pa hopi entrada pa kaha di Gobièrnu.

Software Belastingdienst no ta sirbi  

Un otro aspekto ku ta stroba Gobièrnu di generá e fondonan nesesario ta e software ku no ta sirbi su meta. Manera ta konosí servisio di belasting ta kompletamente outomatisá. Algun aña kaba ku Gobièrnu a paga e kompania Bearingpoint hopi mion florin pa traha entre otro un software pa servisio di impuesto. Minister di finansa anterior a publiká algun luna pasá ku kompanianan ta haña mas tempu pa nan hasi deklarashon di nan belasting. Una bes no hasi deklarashon e kompanianan no ta paga belasting tampoko i esei a pone ku Gobièrnu a keda sin haña alrededor di 100 mion florin.

Minister di finansa komo profeshonal den tur loke ta trata belasting i finansa a bai investigá i a haña sa ku tin un programa nobo ku Bearingpoint a traha pero ni sikiera a tèst e ainda.

Den Gobièrnu no tin sufisiente trahadó pa tèst e sistema. Minister a pidi yudansa di Vereniging Belasting Adviseurs di Kòrsou pa laga nan profeshonalnan tèst e programa. Esakinan ta profeshonalnan den sektor priva ku diariamente ta hasi deklarashon pa nan klientenan. For di e asosiashon a sali un lista largu di puntonan ku e programa di Bearingpoint no ta kumpli kuné.

E minister a indiká ku mester atendé e asuntu aki, pasobra kada bia ku puntra pa splikashon riba e loke nan a kobra pe, kaba Gobièrnu mester bolbe paga mas.

E siman aki lo tin un reunion entre Bearingpoint, inspekshon di belasting i Vereniging Belasting Adviseurs pa solushoná e problema pasobra pa sèptèmber kompanianan mester por hasi deklarashon (aangifte).

EXTRA a puntra e minister kon realístiko su plan ta pa logra tur e puntonan ariba menshoná i e mandatario a indiká ku e mes ta reuní ku esnan responsabel i ta pèrkurá pa haña resultado pasobra e pais aki no por sigui den e situashon aktual.