Ta spera proposishon nobo:

WILLEMSTAD.- Ayera den oranan di mainta trahadónan di Betesda a pone trabou abou, pasombra nan no ta di akuerdo ku a base di reorganisashon na e instituto di kuido, ku kuater kolega lo pèrdè trabou.
Den deklarashon pa EXTRA, presidente di CBV sr. Johnsel Diaoen a bisa ku Betesda tin rapòrt di Inspekshon di 2016 ku ta indiká ku mester hasi efisiensia i nan mester kana yega pa reorganisá algun departamento den Betesda. Betesda a aserká CBV tokante di e reorganisashon. CBV no ta pro reorganisashon, pero basta e no ta mishi ku trahadó. Di parti Betesda a pidi pa partidonan keda na otro promé ku bai serka trahadónan. Despues di 4 reunion, a base tur esfuerso, i a evaluá efekto di reorganisashon, tin 5 trahadó ku ta di mas. Por a realoká un (1) persona. Pero a keda 4 trahadó, kaminda ku kier baha nan orarionan.
Siman pasá CBV a reuní pa atendé e proposishon pa e trahadónan, pa e grupo ku ta superfluo. Segun sr. Diaoen tabatin bastante iritashon, i trahadónan a trese nan disgustu dilanti. Algun no ta di akuerdo ku e reorganisashon. A disidí pa CBV bolbe sinta ku e trahadónan, analisá loke a trese dilanti. Pa por traha riba dje. Pero sorprendentemente ayera mainta trahadónan a pone trabou abou i tabata na porta. Trahadónan no ta di akuerdo ku reorganisashon a kosto di nan kupo di trabou. CBV a pidi gerensia i hunta di supervishon Betesda a bisa ku si e proposishon ku bai nan lo asept’é.
Ayera mainta CBV a reuní ku gerensia i direktiva di Betesda
ku e mensahe di miembresia ku nan no ta aprobá e reorganisashon i pa bini ku otro alternativa.
Durante ku e akshon tabata den, representantenan di minister di salubridat a yega na e sitio, entre otro sr. Janga kolaborador i abogado da Costa Gomez i nan a bin skucha pa duna un balor agregá den e reunion. Esnan di ministerio di salubridat a bisa no ta tur kos ta for di mesa i ku nan lo bai studia e rapòrt i bin ku solushon pa tin ménos doló. Ku e palabrashon aki a bai na gerensia. Pues awor e kuestion ta serka minister di salubridat i Betesda.
E representashon di departamento GMN ta promé biaha ku nan ta bin. Nan a yega na mesa hopi habri i pa yega na solushon. Nan a bin ku bendishon di SG di GMN, kaminda lo bin ku proposishon. Ora tin proposishon, CBV, Betesda, i GMN lo bini huntu bèk. Pues lo dura 4 siman pa por tin un proposishon riba mesa. Awor aki e reorganisashon ta for di mesa sperando un proposishon manera ariba indiká, segun sr. Diaoen a bisa na EXTRA.
Mas aleu Diaoen a bisa ku tabatin diferente esfuerso ku Betesda a purba di hasi pa ku e rapòrt di inspekshon 2016. Tin diferente esfuerso hasi, tin basta trabou ku a hasi i ta modernisando. Pero tur kos ta dependé dje entrada ku nan ta haña. Nan kier a kòrta den sierto departamento pero esei no tabata posibel. Tin hopi rekorte ta bin den direkshon di kuido, kual mester atendé, segun Diaoen.