Plet: No duna Tili si i Tala nò

WILLEMSTAD.- Yaël Plet, dirigente di MAN-PIN, a tuma nota ku tin kantidat grandi di persona ku ta konsiderá e forma ku gabinete Pisas II ta parti ‘bashi-premie’ komo unu diskriminatorio. “Minister di Finansa, Javier Silvania ta bisa ku ta paga ‘bashi-premie’ debí ku Gobièrnu a kobra mas impuesto kompará ku loke a presupuestá. Si t’asina anto, ta karga di tur kunuku a yena Punda i ta tur pagadó di OB a pèrkurá pa gobièrnu ta landando den plaka te ku ta hungando San Nikolas ku plaka di pueblo.”

Plet ta bisa ku e no ta kontra pa niun hende haña algu èkstra pa yud’é kubri gastunan mirando kon kosto di bida a subi barbaramente último añanan. Den mesun rosea e ta kuestioná si dikon por ehèmpel trahadónan di sierto fundashon, Banko di Seguro Sosial òf Selikor no ta haña e mesun 1.000 florin ku tur ámtenar, trahadónan igual, fundashonnan i kompanianan anónimo ku Silvania a anunsiá. E ta mustra ku e instansianan aki tambe ta dependé di supsidio òf presupuesto ku gobièrnu ta pone na nan disposishon pa asina por kumpli ku komunidat. Plet ta enfatisá ku e punto prinsipal ta trato igual pa tur trahadó i ku mester repartí e bonansa finansiero ku pueblo a produsí di un forma ku tur hende ta haña un alivio.

“Un biaha mas mi ta bisa, mi no ta kontra ku ta duna bèk na komunidat loke komunidat a produsí, pero no por duna un grupo so. Tambe Plet ta remarká ku shofùrnan di bùs, taksistanan i trahadónan di por ehèmpel pakus, supermerkado, libreria, floristeria, hotèl, etsetera tambe ta paga OB. “Nan tambe a aportá pagando OB pa awe gobièrnu tin bonansa.”

Plet, igualmente, ta sostené i ta kompartí e punto di bista di e organisashonnan di penshonadonan. Nan tambe a reklamá trato desigual di parti di Gabinete Pisas pasobra kosto di bida a subi pa tur penshonado miéntras ta esnan ku un entrada te 1.100 florin so ta haña un bónùs di 350 florin siendo ta tur penshonado ta den e mesun barku.

Mas aleu e ta remarká ku un gobièrnu serio ta manehá pais na bienestar di tur. “Si tin un espasio finansiero, gobièrnu mester tuma desishonnan ku ta faboresé komunidat kompletu. No grupitonan so.”

Plet ta mustra ku MAN-PIN ta konta ku e sosten di e votadó na elekshon próksimo pa por haña sufisiente forsa den parlamento pa por ehekutá MAN-PIN su programa di urgensia den e promé 100 dianan di gobernashon. “Un promé meta ta di redusí OB ya asina hende tin mas plaka den nan saku di forma struktural. Dor di duna florin balor pueblo por kumpra mas.”

E ta terminá bisando: “Aki ta kos serio”.

Foto:

...Yaël Plet...